Wi, parski Li kapav sanz so latitid kan bann dimounn sanz zot fason azir. Par exanp, kan Bondie ti avoy enn mesaz zizman pou bann dimounn dan ansien Izrael, Li ti dir: “Kitfwa zot pou ekoute ek zot tou pou aret fer seki move, ek mo pou sanz mo fason panse konsernan maler ki mo’nn deside pou amenn lor zot akoz zot bann move aksion.”​—Zeremi 26:3.

 Kan finn tradir sa verse-la, boukou tradiksion Labib finn met lexpresion “mo pou repanti” konsernan sa maler-la, ki fer krwar ki Bondie inn fer enn erer. Me selman, dan lang Ebre orizinal, term ki servi se “sanz so fason panse ouswa so lintansion.” Enn spesialis ti ekrir: “Kan enn dimounn sanz so fason azir sa kapav fer Bondie sanz so zizman.”

 Biensir, mem si Bondie kapav sanz so fason panse sa pa vedir ki Li oblize sanz li. Anou examinn sertin sitiasion kot Labib montre ki Bondie pa’nn sanz so fason panse:

•   Bondie pa ti les Balak fer Li sanz So fason panse ek pa ti les li modi nasion Izrael.​—Nonb 23:18-20.

•   Kan Lerwa Sail ti vinn bien move, Bondie pa ti sanz so fason panse ek Li ti rezet li antan ki lerwa.​—1 Samiel 15:28, 29.

•   Bondie pou realiz so promes pou fer so Garson vinn enn pret pou touletan. Bondie pa pou sanz So fason panse.​—Psom 110:4.

 Wi, dan Labib, Bondie dir: “Momem Zeova; mo pa sanze.” (Malaki 3:6) Labib dir osi ki Bondie “pa sanze kouma mouvman lonbraz sanze.” (Zak 1:17) Alor, eski savedir ki Labib kontredir limem kan li dir ki Bondie pa sanze me ki so fason panse sanze? Non, parski Bondie so personalite pa sanze ek so bann prinsip lor lamour ek lazistis zame sanze. (Deteronom 32:4; 1 Zan 4:8) Me kanmem sa, li kapav donn bann dimounn diferan linstriksion dan bann diferan moman. Par exanp, Lerwa David ti al lager kont bann Filistin de fwa, me sak fwa Bondie ti donn li bann diferan linstriksion. Ek pourtan, toulede metod ti amenn laviktwar.​—2 Samiel 5:18-25.

 Non, parkont Li regrete ki laplipar dimounn pa interese ar Li ouswa rezet Li. Kan Labib dekrir bann kondision lor later dan lepok Noe, zis avan Deliz, li dir: “Zeova ti regrete ki Li ti kree bann dimounn lor later, ek so leker ti fermal.” (Zenez 6:6) Dan sa verse-la, mo “regrete” vinn depi mo Ebre ki vedir “sanz fason panse.” Bondie ti sanz so fason panse lor laplipar dimounn ki ti viv avan Deliz parski zot ti vinn bien move. (Zenez 6:5, 11) Mem si Li ti sagrin ki zot ti swazir enn move semin, Li pa ti sanz so latitid anver tou dimounn. Ofet, kan ti ena Deliz, Li ti prezerv limanite kan Li ti sap Noe ek so fami.​—Zenez 8:21; 2 Pier 2:5, 9.