Eski Later Pou Detrir?

ZWE

Seki Labib dir

Non, later zame pa pou detrir, brile, ouswa ranplase. Labib montre ki Bondie finn kree later pou ki bann dimounn viv lor la pou touletan.

“Bann ki swiv bon sime pou posed later e viv lor la pou toultan.”—Psom 37:29, PKM.
“[Bondie] finn kree later lor soubasman solid ki nannye pa pou bouze.”—Psom 104:5, PKM.
“Later res pou touletan.”—Ekleziast 1:4.
“Li ki finn form later ek ki finn fer li, Limem ki finn etabli later dan enn fason solid, ki pa finn kree li pou nanye, [me] ki finn form li pou ki dimounn res lor la.”—Izai 45:18.

Eski bann dimounn pou detrir later?

Bondie pa pou les bann dimounn detrir later akoz polision, lager, ouswa lezot kitsoz. Okontrer, Li “pou detrir bann ki detrir later.” (Revelasion 11:18, NTKM) Kouma Li pou fer sa?

Bondie pou ranplas bann gouvernman imin, ki pa pe kapav protez later, avek enn Rwayom parfe ki pou dan lesiel. (Daniel 2:44; Matie 6:9, 10, NTKM) Se Garson Bondie, Zezi Kris, ki pou diriz sa Rwayom-la. (Izai 9:6, 7) Kan li ti lor later, Zezi ti montre ki li ti kapav kontrol lanatir. (Mark 4:35-41, NTKM) Antan ki Lerwa dan Rwayom Bondie, Zezi pou ena full kontrol lor later ek lanatir. Li pou regle bann problem lanvironnman, ek pou fer later revinn parey kouma li ti ete dan zardin Edenn.—Matie 19:28, NTKM; Lik 23:43, NTKM.

Eski Labib ansegne ki later pou brile?

Non, li pa dir sa. Bann dimounn souvan pans sa, parski zot mal konpran seki ena dan 2 Pier 3:7 (NTKM) ki dir ki “finn rezerv lesiel ek later zordi pou dife.” Anou get de pwin inportan ki pou ed nou konpran sa verse-la:

Labib servi bann mo kouma “lesiel,” “later,” ek “dife” pou fer referans ar plizir kitsoz. Par exanp, Zenez 11:1 dir: “Later antie ti koz enn sel lang.” Isi, “later” fer referans ar bann dimounn.
Kontex 2 Pier 3:7 (NTKM) ed nou pou konpran lexpresion lesiel, later, ek dife. Verse 5 ek 6 fer referans ar Deliz ki ti ena dan lepok Noe. Pandan Deliz, sa vie lemond-la finn detrir, me later pa finn disparet. Okontrer, Deliz finn detrir bann dimounn ki ti violan, ouswa “later.” (Zenez 6:11) Li’nn osi detrir “lesiel,” setadir bann dimounn ki ti dirize sa lepok-la. Alor, se bann dimounn move ki ti detrir, pa nou planet. Noe ek so fami ti gagn lavi sov ek zot ti kontign res lor later apre Deliz.—Zenez 8:15-18.

Dan mem fason ki delo ti detrir bann move dimounn pandan Deliz, dife ki mansione dan 2 Pier 3:7 (NTKM) pou detrir bann move dimounn, pa later. Bondie promet ki Li pou etabli “enn nouvo lesiel ek enn nouvo later kot pou ena lazistis.” (2 Pier 3:13, NTKM) “Nouvo lesiel,” setadir Rwayom Bondie, pou diriz “nouvo later,” setadir bann dimounn ki obeir Bondie. Kan Rwayom Bondie pou dirize, later pou vinn enn paradi kot pou ena lape.—Revelasion 21:1-4, NTKM.