Kifer Apel Zezi Garson Bondie?
Seki Labib dir
Souvan Labib apel Zezi “Garson Bondie.” (Zan 1:49, NTKM) Lexpresion “Garson Bondie” montre ki Bondie Li Kreater tou kitsoz, Limem Lasours lavi. Savedir, ki Li’nn kree Zezi osi. (Psom 36:9, PKM; Revelasion 4:11, NTKM) Labib pa dir ki Bondie ti vinn enn Papa parey kouma enn imin vinn paran enn zanfan.
Labib apel osi bann anz “bann garson vre Bondie.” (Zob 1:6) Ek Labib dir ki premie imin, Adan, ti enn “garson Bondie.” (Lik 3:38, NTKM) Selman, parski Zezi ti premie kreasion Bondie ek se zis li tousel ki’nn kree direk par Bondie, Labib dir ki limem Garson Bondie ki pli inportan.
Eski Zezi ti viv dan lesiel avan ki li ti ne lor later?
Wi. Zezi ti enn anz avan ki li ti ne kouma enn imin lor later. Zezi ti dir: “Mo finn desann depi lesiel.”—Zan 6:38; 8:23, NTKM.
Bondie ti kree Zezi avan ki Li kree lezot kitsoz. Konsernan Zezi, Labib dir:
“Li . . . Premie-ne parmi tou bann kreatir.”—Kolosien 1:15, NTKM.
Li “koumansman kreasion Bondie.”—Revelasion 3:14.
Zezi ti akonpli profesi konsernan sa kikenn “ki ti existe depi bien-bien lontan, depi touletan.”—Mishe 5:2; Matie 2:4-6, NTKM.
Ki Zezi ti fer avan ki li vinn lor later?
Li ti ena enn gran pozision dan lesiel. Zezi ti koz lor sa pozision-la kan li ti priye, li ti dir: “Papa, glorifie mwa . . . [avek] laglwar ki mo ti ena kot twa depi komansman, avan ki later ti kre.”—Zan 17:5, NTKM.
Li ti ed so Papa pou kree tou bann lezot kitsoz. Zezi ti travay ansam avek Bondie “kouma enn zouvriye kalifie.” (Proverb 8:30) Konsernan Zezi, Labib dir: “Par so mwayin tou bann lezot kitsoz dan lesiel ek lor later, inn kree.”—Kolosien 1:16.
Par mwayin Zezi, Bondie ti kree tou lezot kitsoz. Sa inplik bann anz ek liniver. (Revelasion 5:11, NTKM) Dan enn sertenn fason, nou kapav konpar relasion ki ena ant Bondie ek Zezi avek enn arsitek ek enn kontrakter. Arsitek-la fer enn plan ek kontrakter-la servi sa plan-la pou fer enn batiman.
Li ti Laparol. Kan Labib koz lor Zezi so lavi dan lesiel avan ki li vinn lor later, li apel Zezi “Laparol.” (Zan 1:1, NTKM) Sa montre ki Bondie ti servi so Garson pou transmet bann linformasion ek bann linstriksion ar bann lezot anz.
Bondie ti osi servi Zezi kouma Port-Parol pou koz avek bann dimounn lor later. Li posib osi ki Bondie ti servi Zezi kouma so port-parol pou koz avek Adan ek Ev dan zardin Edenn. (Zenez 2:16, 17) Kan bann Izraelit ti dezer, enn anz ti gid zot ek zot ti bizin obeir li. Kitfwa sa anz-la ti Zezi.—Exod 23:20-23. a
a Laparol, setadir Zezi, li pa ti sel anz ki Bondie ti servi kouma port-parol. Par exanp, dan lepase, Bondie ti servi bann lezot anz pou transmet pep Izrael so lalwa.—Zistwar Bann Apot 7:53, NTKM; Galat 3:19, NTKM; Ebre 2:2, 3, NTKM.
Ena Osi
LANSEGNMAN LABIB KI INPORTAN
Eski Zezi Kris Limem Bondie?
Eski se limem Bondie Tou-Pwisan? Ouswa eski zot de dimounn diferan?
