Sertin kristase ek lezot organism ki viv dan lamer kree bann gro problem pou bann bato parski zot viv ek miltipliye anba lakok bann bato. Zot kol anba lakok bann bato, lerla sa ralanti bann bato ek fer zot bril plis lesans. Ek akoz sa, bizin tir bann bato dan delo sak de-z-an pou netway zot. Bann siantis pe etidie seki ena dan lanatir pou gagn bann solision pou regle sa problem-la.

 Reflesi lor la: Bann resers inn montre ki lapo enn labalenn pilot (Globicephala melas), ki ena bann long nazwar, ena bann kapasite pou netway li par limem. So lapo pa lis parski ena bann long lalign ki bien mins lor la. Lerla, sa anpes bann kristase pou kol ar lapo labalenn-la. Lespas ki ena ant bann lalign-la ranpli ar enn zel ki atak bann alg ek bann bakteri. Kan li perdi so lapo, labalenn-la prodir enn nouvo zel.

 Bann siantis pe anvi kree enn sistem pou lakok bann bato, ki parey kouma lapo labalenn pilot. Dan lepase, zot ti pe servi enn lapintir spesial ki anpes sa bann organism-la pou kol anba lakok bann bato. Me pa tro lontan, inn interdi pou servi sa lapintir spesial la parski li toxik pou bann organism ki viv anba delo. Bann siantis inn gagn enn solision: Kouver lakok enn bato avek enn file an metal, kot ena plizir trou ki larg tigit-tigit enn prodwi simik ki pa toxik. Sa prodwi-la vinn epe kouma enn zel kan li rant an kontak avek delo lamer. Li vinn koumadir enn lapo ki rekouver lakok bato-la net. Avek letan, sa lapo-la (ki ena enn lepeser apepre 0.7 milimet [0.03 pous]) koumans degrade ek tou bann organism ki’nn kole al ansam ar li. Lerla, sa sistem-la reprodir enn nouvo kous zel ki pou protez lakok bato-la.

 Bann test inn montre ki sa sistem-la kapav diminie problem ki bann bato gagne par 100 fwa. Ek sa pou enn gran lavantaz pou bann konpagni bato, parski sa kout bien ser pou amenn enn bato ater pou netway li.

 Ki ou panse? Eski lapo labalenn pilot inn aparet par limem? Ouswa eski inn kree sa?