Bann barbara se bann zanimo ki viv anba lamer ek lor resif. Lor zot lapo ena bann ti bos ek bann ti korn. Zot extra flexib, zot kapav vinn mou kouma lasir ouswa dir kouma dibwa dan lespas de-trwa minit ouswa segonn. Akoz zot mou, sa permet zot pou rant dan bann ti trou. Apre sa, zot vinn dir pou ki bann predater pa kapav ris zot. Bann barbara kapav fer sa gras-a zot lapo ki extraordiner.

 Reflesi lor la: Lapo enn barbara kapav vinn dir, inpe mou ouswa bien mou. Pou fer sa, bann barbara servi bann diferan proteinn pou konekte ouswa dekonekte bann fib, ki kouma bann difil, dan zot lapo.

 Zot servi sertin proteinn pou fer bann ti pon ouswa lasenn ant bann fib pou ki zot lapo vinn pli dir. Ek zot servi bann lezot proteinn ki larg sa bann fib-la pou fer zot lapo vinn mou. Lapo enn barbara kapav vinn telman mou ki li paret koumadir li pe fonn.

 Bann siantis pe esey invant bann kitsoz ki ena mem kapasite ki lapo enn barbara. Par exanp, souvan bann dokter bizin servi bann elektrod kan zot oper servo enn dimounn. Lobzektif bann siantis se pou invant bann elektrod ki ase dir pou ki kapav plas zot exakteman kot bizin ek ki kapav revinn mou apre. Si bann elektrod zot flexib, sa pou diminie risk ki enn lekor rezet zot.

 Ki ou panse? Kan ou get kapasite ki lapo enn barbara ena, ki ou pou dir? Li’nn aparet par limem ouswa eski inn kree sa?