Ninport kisannla ki’nn esey touy enn mous kone ki kantite li difisil pou fer sa. Me, bien souvan sa bann insekt-la reisi sape parski zot reazir bien vit parey kouma zekler.

 Drosophile ouswa mous frwi se enn mous ki manz bann frwi ki tro mir ouswa gate. Bann siantis inn dekouver ki dan lespas enn segonn, sa mous-la kapav tourne parey kouma bann avion lager. Profeser Michael Dickinson dir ki kan sa mous-la ne, “li kapav anvole kouma enn profesionel. Se koumadir inn met enn ti baba ki’nn fek ne dan enn avion lager ek li deza kone kouma pou kontrol li.”

 Bann siantis inn filme bann mouvman akrobatik sa mous-la ek zot inn trouve ki li bat so lezel 200 fwa par segonn. Pourtan, enn sel batman lezel ase pou re-diriz so lekor pou ki li kapav evit enn danze.

 Ki nou kapav dir lor kantite letan ki li pran pou reazir? Bann siantis inn trouve ki kan ena enn danze, sa bann mous-la kapav reazir 50 fwa pli vit ki enn dimounn bat so lizie. Profeser Dickinson explike: “Mous-la fer bann kalkil bien konplike dan bien tigit letan pou kone kotsa danze-la ete ek dan ki direksion exakteman li bizin anvole pou li reisi sape.”

 Bann siantis pankor arive konpran kouma sa mous frwi la so ti servo kapav fer bann kitsoz extraordiner koumsa.

 Ki ou panse? Kan ou get kapasite akrobatik enn mous frwi, ki ou pou dir? Li’nn aparet par limem ouswa eski inn kree sa?