Biro mondial bann Temwin Zeova pe res azour ar lepidemi coronavirus (COVID-19) ki pe afekte boukou dimounn inpe partou dan lemond. Bann profesi Labib ti fini anonse ki, dan bann dernie zour, ti pou ena bann lepidemi. (Lik 21:11) Kan ena enn lepidemi, li inportan ki nou pran sertin prekosion pou protez nou ek lezot osi.​—Proverb 22:3.

Kitfwa sertin pe demann zot seki pe ariv nou bann frer ek ser ki pe viv dan bann landrwa kot ena sa lepidemi-la. Sa lepidemi-la finn sirtou afekte bann Betel ek bann lasanble lokal dan Litali, Zapon, ek Kore Disid. Dan sertin Betel, finn bizin kennsel bann vizit. Dan sertin pei, gouvernman finn desid pou kennsel bann gran rasanbleman. Alor, dan sertin landrwa, finn bizin kennsel bann lasanble sirkonskripsion. Anplis, sertin lasanble lokal finn bizin sanz fason ki zot prese ek fason ki zot fer bann renion. Malgre sa bann difikilte-la, nou bann frer ek ser pe kontign ankouraz zot kamarad pou res for lor plan spiritiel.​—Zid 20, 21.

Dan sa sitiasion-la, nou bann frer ek ser inn trouv bann prinsip ki mansione anba bien itil. Sa bann konsey-la kapav ed ou ek ou fami si ena sa lepidemi-la dan ou landrwa.

• Pa Panike. Li bon ki nou res azour ar bann linformasion konsernan sa lepidemi-la, ek ki nou pran bann prekosion dapre bann linformasion ki nou ena. Fode pa ki nou les laper trap nou ek ki nou panike.​—Proverb 14:15; Izai 30:15.

• Swiv Bann Instriksion Gouvernman. Souvan bann lotorite donn bann instriksion ek zot dir ki bann prekosion nou bizin pran konsernan nou lasante. Li bon ki nou res azour ar sa bann linformasion-la ek ki nou swiv bann instriksion ki nou gagne.​—Romin 13:1.

• Ena enn Bon Lizienn. Li bien inportan ki nou lav nou lame souvan ar delo ek savon, ouswa avek enn hand sanitizer. Li inportan osi ki nou netway bann kitsoz ki nou tous souvan, ki li kot nou ouswa dan Lasal. Anplis, dapre bann exper lor lasante, li bon ki nou pa donn lame pou dir bonzour, parski sa kapav fer viris-la fane. Lor sit Internet l’Organisation mondiale de la santé, ena bann linformasion lor coronavirus.

• Montre Lamour. Nou tou nou kone ki li bien inportan ki nou asiste nou bann renion ek ki nou prese. Me si nou malad, li pli bon ki nou res kot nou pou ki nou pa kontaminn lezot. Kan nou fer sa, nou montre ki nou ena lamour ek konsiderasion pou nou bann frer ek ser, ek pou bann dimounn ki pa Temwin.​—Matie 22:39.

• Swiv Bann Instriksion lor Bann Sanzman Konsernan Bann Renion ek Predikasion. Dan bann landrwa kot ena sa lepidemi-la, li posib ki bann Betel kennsel bann renion, bann lasanble, ouswa bann lezot levennman teokratik. Samem ki finn arive dan bann landrwa kot viris COVID-19 inn fane, kouma Litali, Zapon, ek Kore Disid. Dan sa ka-la, bann ansien kapav pran bann dispozision pou ki bann proklamater swiv bann renion kot zot lor streaming. Konsernan predikasion, bann proklamater kapav pres par telefonn, par SMS, par mail, ouswa par let.

Dan sa bann lartik-la, ou pou gagn bann lezot linformasion konsernan bann prekosion ki ou kapav pran:

• « Protégez-vous des maladies » dan Leve! No. 6 2016 an Franse, paz 4-6

• « Des moyens d’améliorer votre santé » dan Leve! Zin 2015 an Franse, paz 2-7

• « Une meilleure santé, c’est possible ! Leçon 4 : Protégez votre santé » dan Leve! Mars 2011 an Franse, paz 7