6 AVRIL 2020
KANADA
Lape dan enn Lepok kot Boukou Dimounn Pe Panike
Frer Jean-Yves Mudaheranwa ek so madam, Vasthie, pe ed bann dimounn ki malad ar coronavirus dan Monreal, Kanada. Frer Mudaheranwa enn dokter dan enn lopital, ek Ser Mudaheranwa travay kouma ners dan enn lopital ki okip bann dimounn ki malad akoz COVID-19. Alor ki boukou dimounn zordi bien strese, Frer ek Ser Mudaheranwa pe kont lor Zeova pou gagn lafors, ek zot pe gagn bann bienfe gras-a promes ki Zeova inn fer, ki leker so bann serviter pou dan lazwa.—Izai 65:14.
Frer Mudaheranwa dir: “Boukou parmi mo bann koleg pe gagn extra per. Zame mo’nn trouv zot koumsa.” Ser Mudaheranwa dir: “Letid personel pe bien ed nou. Nou reflesi lor sign bann dernie zour, ek nou rapel ki Zeova avek nou ek ki Li pa pou abandonn nou. Lapriyer osi enn gran led. Avan ki mo al travay ek koumans mo lazourne, mo priye ek mo resanti lape.”
Frer ek Ser Mudaheranwa pe partisip dan enn renion avek zot lasanble
Frer Mudaheranwa dir: “Mo sorti Rwanda, ek mo’nn reisi sirviv enn zenosid. Dan Kanada, zame enn kitsoz koumsa inn arive, alor parfwa nou kapav bliye ki nou pe viv dan bann dernie zour. Mo bizin rekonet ki, mo pa’nn touletan panse ki zour Zeova pre koumsa. Sa lepidemi-la finn fortifie mo lafwa ki nou pe viv dan bann dernie zour, ek li’nn fortifie mo lafwa dan Labib ek bann profesi Biblik.”
Bann serviter Zeova partou dan lemond antie ena mem lafwa ki Frer ek Ser Mudaheranwa, ek zot pe kontign ena lape pandan sa sitiasion difisil la.—Izai 48:18.