Yendu yi niib kul k ban gii jaand’o, nnyan i k b bu fid g nagn’o. (1 San 5:14) Ama Yendu g cenŋ jaandi kul kaa. Biibl maad g jua nba cagn u ŋaapuo Yendu kan cenŋ u jaandi. (1 Piɛr 3:7) Youg nba k Israyɛl bid bo tie bonbiil, Biibl maad g Yendu bo g cenŋ b jaandi. L kul ŋɔnŋ g jaandi g tie jinjelnbonn kaa, l tie Yendu ŋalbalg i. Ama danm nba tien biid nba biɛ paaa mɔno gii tuo g lebd b binbem, Yendu bu cenŋ b jaandi.—Lii Esaayi 1:15, MN; Tuona 3:19.

T gii jaand Yendu t pug’o i, l po n te k l bual k tin gii jaand t Tagtua Jeofa kukua. (Matieog 4:10; 6:9) Tin tie biiddanm nyan po n te k l mɔn k tin tu jaand Yiesu sann po g dugn wano n kpe t biid po. (San 14:6) Jeofa g bua tin tu banŋ jaandi g bil t yul n gii tun g maad’o lann kukua. U biɛ g bua tin tu gii lii jaandi nba g niib diɛn kadaad n ninŋ kaa. U bua tin gii maad’o yal be t pala n ninŋ i.—Lii Matieog 6:7; Filiip Kristo-yab 4:6, 7.

T tagtua bu fid g cenŋ’ti baa t gii jaand t pal n ninŋ. (1 Samiɛl 1:12, 13, MN) Jeofa cab’ti k tin gii jaand’o youg kul. T bu fid g jaand’o siŋaaɔg n ninŋ, daajuog, youg nba k t bua n di lann i kaa youg nba k t be maba n ninŋ.—Lii 1 Piɛr 5:7; Matieog 15:36.

Dinne niib bonciɛnn g dug Yendu po g biɛ laa g tinŋ kan ban g kpand paradi, l po n te k l g tie faala t po yen tin nagn  Yendu. (2 Timote 3:1, 4; 2 Piɛr 3:3, 13) Lann n te k l mɔn k tin gii taand yen t lieb nba tie Kristo-yab t kul ń fid gii paand t lieb pala.—Lii Ebro-nba 10:24, 25.

I gii taand yen danm nba bua Yendu, l bu tod’i yin nagn’o. I gii saa Jeofa Sieda-nba tintaani, b dindann bu fid g paan i pala.—Lii Rom Kristo-yab 1:11, 12.

A gii tugd yaam g mali ŋan banŋ yal nba Biibl n ninŋ po, l bu tod’a ŋan nagn Jeofa. Tu tug yaam g mali Yendu tuona po, u cegli po yen u puoni po. A gii jaand Yendu g biɛ mali ŋan gaan tunda nba u kadaaɔg n ninŋ po, l bu tod’a ŋan bann k u mɔg yanfuom g biɛ bua’a.—Lii Sosuwe 1:8; Biɛyani 1:1-3.

G fid ŋan nagn Yendu l mɔn k ŋan gii dug u po g biɛ gii mɔg dindann u ninŋ. Ama i ban g dindann tie nyan tiig nyan i. A gii ŋuun tiig l bual k ŋan gii wulg’o nyum i wan fid g kpaad. A gii bua a dindann mɔ ń kpaad, l bual k ŋan gii tun g tiɛd yal po te k a pal paa k ŋan daan yal nba bu tien yen mɔni.—Lii Matieog 4:4; Ebro-nba 11:1, 6.

Jeofa pal siɛd danm nba bua’ɔg po. U bu fid g guul’b g baa siɛl ń daa te k b dindann n wad, k ban biɛ gii daan k b bu la miɛl nba kan ban g gbenn. (Biɛyani 91:1, 2, 7-10) Jeofa ŋɔnŋ’ti tin bu tien nand g lɔgl bontitebiid g fid gii be laafiɛ yen pamann n ninŋ, u biɛ ŋɔnŋ’ti tin bu tien nand t binbem ń gii ŋan.—Lii Saak 1:25; 4:4, 8.