LECCIÓN 05
Ju Biblia ito bechïbo Diosta mensájeta jípure.
Jehová wepu musälamachi míkrita itom makla: jume 66 líbrom Bíbliampo órekame. Te jamake emo temáixna: “¿Jakun bétanasu yew síkak ju Biblia? ¿Jábesu a yäla?”. Ime nátemaixrim yomʼmia bechïbo, ata binʼna jáchisu tü nókim Diosta bétana itom táywarim taxti yumala.
1. Si Juka Bíbliata ówim a jióxtek, ¿jatchiákam Diosta a yäla tiyʼya?
40 ówim —ka nanäla tékilekame, riríkom éntok polóbem— Bíbliatam jióxtek. 1513 wásuktiapo jióxte nátewak ketune ke Crístota yew machiako wanay 98 wásuktiapo itom táywarimpo chúpawak. Júnel bechïbo, 1.600 wásuktiamim nükak a jioxte bechïbo. Junëli junʼne, ju Biblia ka jijʼjiöbe. ¿Jáchisëni? Buéytuk Dios a yäla (1 Tesalonicenses 2:13 te leerua). Ime ówim ka bem eáwim ama jióxtek. Bempo, “Diosta bétanam nókak espíritu santo am aniaka bechïbo” (2 Pedro 1:21). a A espíritu sántotamak, Dios ime ówim aniak a eawi jióxtenake bechïbo (2 Timoteo 3:16).
2. ¿Jábesu ara Bíbliata jípure?
Géntem “sïme naciónimpo jómeme, tribu éntok tatʼtabuia nokta nokame éntok puéblom” áram tüwata ama yew wikʼke jume türi nókim Bíbliata mákame bétana (Apocalipsis 14:6 te leerua). Dios ika yäla Bíbliata juebena nokimpo ayúnake bechïbo. I libro jita librota bepʼpune énriapo kuáktiawa. Batʼte sïme géntem ara jüneya jítasu bétana noka ju Biblia, eläposu jakun a joaka junʼne o jita nokita nokame junʼne.
3. ¿Jáchisu Bíbliata suáyak Jehová?
Ju Biblia materiálim lawti ólasi aw jojuámepo jióxtewak. Róllomim usáruak nabólim bewámak o kuta papiro tiámtapo. Te ówim Bíbliata nákeme juebénam cópiamim yawʼwak emo suáyaka mámpo am jióxteka. Eläposu juebena géntem may utʼtiarata jípureme a lütia báreka eyʼyay, wate bem jiápsitam jinwa máchipo yétchak a suaya báreka. Jehová ka aw tóixla ke kayta a bia chätuna ítomak nok bechïbo. Ju Biblia júnel jiawa: “Ju noki itom Diosta bétana jiba bechïbotunake” (Isaías 40:8).
CHËRE IÁ BÉTANA JÜNENAKE
Chëte a täyanake jachin Dios wate ówim aniak Bíbliata jióxtenake bechïbo. Ketʼte a binʼna juka a yäkawi a suaya báreka éntok jume géntem a jípunake bechïbo.
4. Ju Biblia itom texwa jábesu a yäla
VIDÉOTEM bitcha. Chúkula 2 Timoteo 3:16 tem leerua chúkula éntok iá bétanem naw etʼtexwa:
-
Si juka Bíbliata ówim a jióxtela, ¿jatchiaka Diosta a nókim tiyʼya?
-
¿Lüturia jäni a sual bechïbo ke Dios jume géntem jioxtelérom téxwak jachin a eawi bétana?
Ju secretario cártata jioxte, te ju mensaje a teko a atʼtiak, apo a téxwasime jita ama jióxtenakëwi. Junëli weyʼye Bíbliatamaki: ówim a jióxtek, te ju mensaje Diosta bétana weyʼye.
5. Ju Biblia juebena jinwa máchipo yew simla
Si ju Biblia Diosta bétana weyʼye, ¿jachu ka a suáyanay jäni? Históriata wëyo juebena yáwram Bíbliata lütia bárekam eyʼyak. Ket líderem religiósom ayuákay juka génteta ka a leerua iʼaka. Te, eläposu sáyom bepʼpa junʼne éntokim am më báreka jiáway ketchi, juebena géntem bem jiápsitam jinwa máchipo yétchak a suaya báreka. Wepu owta ika yälame täya bechïbo, VIDÉOTEM bitcha chúkula éntok iá bétanem naw etʼtexwa:
-
Eni jüneaka may nasʼsuawakäwi Bíbliata suaya bechïbo, ¿chëre a leerua peyʼya? ¿Jatchiá?
Salmo 119:97 tem leerua chúkula éntok iá bétanem naw etʼtexwa:
-
¿Jítasu génteta yuyuʼuk a jiápsita jinwa máchipo tóix bechïbo Bíbliata kuaktia báreka éntok a chíbextia bechïbo?
6. Wepu libro sïmem bechïbo
Ju Biblia jita líbrota bepʼpune chë kuáktiawa éntok chíbextiawa Hechos 10:34 éntok 35 tem leerua chúkula éntok iá bétanem naw etʼtexwa:
-
¿Jatchiaka Dios a nokita juebena nokimpo a kuaktia iʼa éntok sïmachi a chíbextia iʼa?
-
¿Jítase chë ama türe Bíbliapo?
Batʼte
100%po
sïme ániachi
ara Bíbliata leerua wepu nokimpo bem ámet jüneamechi
Chë
3.000
ama bepʼpa nokímpo jióxteri,
yumálasi o lébelaysi
5.000 millónim
Batʼte Bíbliatam yärim.
Ju libro, jita librota bepʼpune yäri
WATE JUNËLIM JIJIÁ: “Ju Biblia kie wepu libro batnátaka wëme ówim a jióxtelakäwi”.
-
¿Jáchise jiawa empo?
-
¿Jita pruébam ayu juka Bíbliata Diosta noki ajáriakäwi?
JÍTASE AMA TATÄYAK
Ju Biblia Diosta noki ajäria, wanay apo a suáyala sïme géntem akima jípunake bechïbo.
¿Jítase yomʼmia eyʼyey?
-
¿Jáchisu jiawbare ke Dios ówim aniak Bíbliata jióxtenake bechïbo?
-
¿Jítase chë ama tutüre Bíbliata tülisi ama yew sikakäwi juebena jinwa machipo bétana? ¿Éntok jítasu chëre ama yew bitʼtuna jachin a kuáktiakäwi éntok jachin a chíbextiakäwi bétana?
-
¿Jáchise emo inʼnea jüneaka sïmeta Diosta yäkawi émomak nok bechïbo?
CHËRE JITA AMA TÄYA
Akea täya Bíbliata historia: batnátaka jióxteri náteka énriapo kuáktiarim ayúkame taxti.
“¿Jáchisu ítow nüpawak ju Biblia?” (¡Despertad!, noviembre 2007ta wériayo)
Akea leerua jachin ju Biblia tülisi yew síkak báix buéwru sáyom bétana.
“Ju Biblia. Wepu historia tülisi ama yew sikakäwi bétana” (La Atalaya, núm. 4 2016ta wériayo)
Akea bitcha jachin wate géntem jinwa machipo émom yétchak kie Bíbliata kuáktia báreka.
Juebena cópiam éntok kuáktiarim ayu Bíbliata bétana. ¿Jáchise jünenake empo ke ju Diosta noki ka täbuiasi yäri?
a Ju espíritu santo Diosta utʼtiara ajäria, o ket junëli, a utʼtiarata usáruako, jumu lección 07po a etʼtexwaka bénasi.