Imi follétopo en bíchakawi, Biblia juebena princípiom jípure enchi aniáname éntok en famíliata. Jehová enchim alʼleiʼa. Wanay juka adoracionta bat yéchako, “huate enchímmeu bëyeme, kía áapola enchímmeu ayu táytinake” (Mateo 6:33). Lios enchi amígotubare. Wanay júneli sïmeta ara en jowawi a yawʼwa juka amistatʼta owsi ámak a jípunake bechïbo, buéytuk jú buewru honor jabe gente ara a jípure (Mateo 22:37, 38).

BÍBLIATA NOKÄWI: “Huanaïne enchim béchïbo achaytunake, huanaï emëe in üusimtunake, entok in malamtunake tï jiaahua jü [Jehová]” (2 Corintios 6:18). Lios tüysi en amígotubare, wanay jumu oración pámani ara aw rúktiwa. Júneli, Jehová itom néjune: “Jíbem Diostau buaana, kaa chúkteka” (1 Tesalonicenses 5:17). Apo sïmeta itom ka alʼlewamta éntok jita ka tüysi itom kom étuame itom aw nok iʼa (Filipenses 4:6). En famíliamak oráruateko, bempo a bítnake ke emo bechïbo Lios tuá lutüria.

Te ket Lióstamak nokaka, keche a jikʼkaixnake. ¿Jáchisute a yánake? A Nokita estudiáruaka éntok publicaciónim ama wëme ketchi (Salmo 1:1, 2). Ache eyʼya jita en täyawi (Salmo 77:11, 12). Liosta jikʼkaix barëteko ket reunión cristiánamew ara wénake (Salmo 122:1-4).

Senu jita ketchi jú relación Jehovátamak itom jípurewi utʼtiata nünake bechïbo wate géntemakte a bétanate noknake. Chë júneli a joáteko, chëre aw jëla emo inʼnenake (Mateo 28:19, 20).

JITA ARA EN YANAKËWI:

• Tiémpote emo makʼka orarua bechïbo éntok Bíbliata chikti täpo am nokákari

• En famíliate aniá wame tekʼkil espirituálim bat an yéchanake bechïbo

BÍBLIATA NOKÄWI: “Diostahuem rúkte; Áapo éntok enchímmeu rúktinake” (Santiago 4:8). Wepu táywarita éntok horate yetcha wepu prográmata famíliapo adoracionta jipu bechïbo (Génesis 18:19). Te ka jú jibʼba: chikti täpo Lióstawe wate wanay en famíliata relación ámak utʼtiata a nütua. Jú Biblia júneli jiawa: “[Jehovata] bétana noknake en joapo joyeka éntok boʼot werámaka éntok böteteko éntok yextëteko” (Deuteronomio 6:6, 7). Josueta bénasite jiáwnake ke júneli jiáwak: “Ínapo éntok in famíliamak Jehovátate tekipánoariabare” (Josue 24:15).

JITA ARA EN YANAKËWI:

• Wepu prográmate yawʼwa famíliata sïme jita ámew béyemta maxtiá bechïbo