Sïmemʼmewi tomʼmi ítow bëye itom famíliata ámew béyemta an jinʼnuria bechïbo (Proverbios 30:8). Buéytuk “jú tomʼmi itom suaya bechïbo” öre (Eclesiastés 7:12). Jámak wëyo ili obiachi famíliatawi tomi bétana nok bechïbo, te kate emo tojʼja ke jú etʼtexwari en matrimóniota obiáchisi a yana (Efesios 4:32). Náwem eyʼya wanay náwem a etʼtexwana jítaposem tómita gastáruana.

BÍBLIATA NOKÄWI: “Jachu eme jábe júne juka kári tüisi buëuruta yáa bárëtek kaa huam yejteka báchä jüneria báanake, ¿jáiki tómita áma kimunakëhui, entok jáikik ä jípurëu ái ä chúpanakëhui?” (Lucas 14:28). Tüysi türi naw a etʼtexwako jáchisem tómita usáruana (Amós 3:3). Náwem a etʼtexwa jítasem jinʼnuna éntok jáikisem ara gastáruana (Proverbios 31:16). Eláposem yún tómita jípure jita jinʼnu bechïbo jú ka júnel jiáwbare ke a kem a jinʼnuna. Kátem emo wikirïatua, juka tómita enchim jípurewi jíbem gastarua (Proverbios 21:5; 22:7).

JITA ARA EN YANAKËWI:

• Mechata lüteyo ili tomʼmi enchimʼmew tawálawi, náwem a etʼtexwa jítasem yánake juka enchimʼmew tawálakame

• Si tomʼmi enchimʼmew bëyeyo, náwem plánim yawʼwa ka tüysi gastarua bechïbo. Senu ejemplo, buáwata yäri jinʼnu iáteko enchim joäpo buáwatem yawʼwa

BÍBLIATA NOKÄWI: Lútula wemta jibe wetua, “kaa [Jehovata] bíchäpo jíbba, ál-la ket jume yoremem bíchäpo” (2 Corintios 8:21). En kunate o en jubite lutüriata texwa jaiki en kobawi éntok jaiki en gastáruawi.

Jibe en kuna o en jubita temaje ketune ke tómita yun gastáruaka (Proverbios 13:10). Naw tü etʼtexwaka ía bétana enchim aniana yanti anwámtem jípuna matrimóniopo. Juka tómita en kobawi famíliata bechïbo bénase a bitcha, ka emo bechïbo jibʼba (1 Timoteo 5:8).

JITA ARA EN YANAKËWI:

• Náwem a etʼtexwa jáikisem wewépulaika ara gastáruana ka emo tetémajeka

• Kate a böbitcha ke wepu problema yew wénake tómita bétana nok bechïbo