LECCIÓN 03
¿Bíbliatat ara etu jäni
Bíbliapo juebena promésam éntok conséjomte tetetʼtia. Jamake jüne peyʼya jita a mámaxtiaw bétana. Te jamake kate tuá a suale a jiáwaw bétana. ¿Ara ámet etu promesamʼmechi éntok conséjomet wepu librota bétana may bínwatu jióxteritaka junʼne? ¿Türi jäni a sual bechïbo Bíbliata jiaw bétana alʼleaka eni jiápsaka éntok púxbaw bicha ketchi? Juebena millónim akima suale ke junëli wénake tiyʼya. Enchite néjune a täyanake bechïbo jatchiásum junëlim eyʼya, wanay akea bitcha si empo ket a türinake.
1. ¿Tuá lutüriapo síkak Bíbliata nokákaw bénasi?
Ju Biblia júnel jiawa ke “tuá nókim jípure tiyʼya” ke tuá a wëpom jióxtewak (Eclesiastés 12:10). Jita wemta tuá sikame éntok géntem wanʼna tiémpopo jiápsakame bétana noka (Lucas 1:3 éntok 3:1, 2 te leerua). Juebena historiadórim éntok arqueólogom tuá a wechiäpo a sikä tiyʼya, géntem jita yälame jak síkak éntok jita béxresimachita wemta Bíbliata nokame bétana.
2. ¿Jatchiákate Bíbliatat eyʼya eläposu wepu libro may binwa náteka jióxtewaka junʼne?
Históriata wëyo, ju Biblia binwa náteka a nókay jita púxbaw bicha wénakew bétana. Ejémplopo bénasi, jita wemta ciénciatamak emo naw wériame bétana noka. Eläposu ka nanäla eaka junʼne ime etʼtexwarim Bíbliata jióxtewapo bétana. Te, énriapo, ju ciencia a noka ke ju Biblia wepu libro a wéchiapo wë tiyʼya. A nókim “jiba ámet etu, eni éntok jiba bechïbo” (Salmo 111:8).
3. ¿Jatchiákate Bíbliata jiaw pámani eyʼya púxbaw bicha wemta bétana?
Ju Biblia profecíam a jípure “jita ketune ke yáwaw bétana noka” (Isaías 46:10). Juebena wemta históriapo tawálakame bétana noka yun wásuktiriampo ketune ke sikaka bétana. Éntok, ket kálakosi a etʼtexwa jachin machi énriapo i ánia. Imi leccionpo wate profecíam Bíbliampo yew nürimte binʼna, éntokte a binʼna jachin ka sualmáchisi tuá a jiaw pámani yew síkak.
CHËRE IÁ BÉTANA JÜNENAKE
Ata binʼnake jachin ju ciencia jita yew wíklakame Bíbliatamak naw aw weria éntok wate profecíam ka sualmáchileme Bíbliapo wëmetate binʼna.
4. Ju ciencia Bíbliata jiáwaw bétana a lutüria tiyʼya
Yun síglom amaw bicha, batʼte sïme géntem a suáley ke ju Buiya jítat jimánialatukay. VIDÉOTEM bitcha.
Ache suwa jita ama jióxtewakäwi wanʼna 3.500 wásuktiriampo jumu Jobta libropo. Job 26:7 tem leerua chúkula éntok iá bétanem naw etʼtexwa:
-
¿Jatchiá ka sualmatchi Bíbliata júnel jiáwaw bétana ke ju Buiya “káitat chäka tiyʼya”?
200 wásuktiriampo jibʼba jünewak ke ju baʼa yuku bénasi kom watwatʼte, wanay báixwo bénasi jikaw sisime juchi namusi aw joákari. Te ache suwa Bíbliata jiaw bétana mílim wásuktiriam amaw bicha. Job 36:27 éntok 28 tem leerua chúkula éntok iá bétanem naw etʼtexwa:
-
¿Jítase chë ama tutürek ika ka tuá obiachi etʼtexwari baʼam bétana?
-
¿Ime téxtom en jübua em leéruakäwi ara enchi aniá chë junë Bíbliatat e bechïbo?
5. Ju Biblia béxresimachi púxbaw bicha wë báreme bétana noka
Isaías 44:27-45:2 táxtem a leerua chúkula éntok iá bétanem naw etʼtexwa:
-
¿Jita kálakosi noka ju Biblia Babilóniata lüti bárew bétana 200 wásuktiriam ketune ke sikákaw bétana?
Ju historia a bitʼtebo ke jumu 539 wásuktiapo ketune ke Jesusta imi buiapo yew machiálako, wepu rey Pérsiapo jomeme Ciro tiame éntok a sontárom Babilóniatam yoʼok. Báchim, juka batwe ciudadta suáyame sekäna bícham a butʼtiak. Chúkula jume Babilóniata puétam étaporitakam táwak, wari bechïbo ámarim kibákek wanáyim ka nasʼsuaka akima yoʼok. Beja 2.500 wásuktiriam ama bepʼpam simsula ika sikaka bétana wanay éntok Babilonia en taxti tátabritaka táwak. Ache suwa eni Bíbliata noklákaw bétana.
Isaías 13:19 éntok 20 tem leerua chúkula éntok iá bétanem naw etʼtexwa:
-
¿Jáchisu aw nok chupʼpak í profecía?
Babilonia Irakpo, tátabritaka
6. Ju Biblia jita énriapo wëme bétana noklátukay
Ju Biblia í tiémpopo itom jiápsapo “último táywarim” bénasi a tetʼtia (2 Timoteo 3:1). Ache suwa jita noklátukay ime táywarim bétana.
Mateo 24:6 éntok 7 tem leerua chúkula éntok iá bétanem naw etʼtexwa:
-
¿Jita nókim béxresimachim noklátukay ju Biblia último táywarim bétana?
2 Timoteo 3:1-5 táxtem a leerua chúkula éntok iá bétanem naw etʼtexwa:
-
Bíbliata noklaw bénasi, ¿jáchisum emo nünay jume géntem último táywarimpo?
-
Jachin jume géntem eni emo nüye bénasi jume textopo nokame bétana, ¿jítase eni bitcha?
WATE JUNËLIM JIJIÁ: “Ju Biblia kie cuéntom éntok leyéndam bétana jiba noka”.
-
¿Jita prueba enchi yúyuek Bíbliatat e bechïbo?
JÍTASE AMA TATÄYAK
Ju ciencia, ju historia éntok jume profecíam a bitʼtua ke árate Bíbliatat eyʼya.
¿Jítase yomʼmia eyʼyey?
-
¿Ju Biblia ajäria jäni wepu libro jita wemta tuá sikakäwi o kie leyéndam noka?
-
¿Jáchisu ju ciencia a lutüria tiyʼya Bíbliata jiaw bétana?
-
¿Akea suale juka Bíbliata púxbaw bicha wemta bétana nokawi? ¿Jatchiase júnel eyʼya?
CHËRE JITA AMA TÄYA
Científicom a bicha pámani, ¿Biblia a jiaw pámani aw weria?
“¿Ju Biblia ciénciata yew búixlamak naw aw weria?” (Jióxteri jw.org ta bétana)
¿Jítasu a yew bitʼtua “último táywarimpo” itom anëpo?
“Búsam profecíam bíbliapo wëme énriapo chúpeme” (La Atalaya, 1 mayo 2011ta wériayo)
Akea bitcha jáchisum chupʼpuk jume profecíam Bíbliapo wëme imperio griégota bétana.
Ache suwa jáchisu jume profecíam Bíbliapo wëme wepu ówta täbuiasi a étituak Bíbliata bétana.
a Jume profecíam, Diosta noklakäwi púxbaw bicha wemta bétana ajäria.
