Ju Biblia a nokʼlatukay ke beja Crístota muksuko maéstrom ara nokïchim bat cristiánom násukum yew wénakey wanáyim juka lutüria Liosta Noki bétana chíchamachisim a yánakey (Hechos 20:29, 30). Ju tuá síkak: maéstrom aranokïchim jume Jesusta maxtiárim éntok jume ówim ka Liosta suáleme maxtiarimʼmak am kütiak, wanay júnel cristianismo ka lutüria ama yew síkak (2 Timoteo 4:3, 4). Íkay bíchaka, ¿jáchisute tuá jüneya ke ju itom suálewi Bíbliata bétana tuá lutüria?

Tiempo yúmak Jehová juka lutüriata yew buixnake bechïbo. Lios a nokʼlatukay ke lütiwamta abe yumayo “ju tuá jünewamta chë juebénasi aw yánakey” (Daniel 12:4). 1870yo, wepu ili grupo lutüriata járiame at suuwa ke wate religiónim maxtíriam ka Bíbliapo wëmem mamáxtiay. Wa bechïbo jume tuá maxtiárim Liosta Nókipo wëme tüysim at suaka am estudiáruataytek, wanay Jehová am aniá tüysim ámet jünenake bechïbo.

Ówim tü jiápsekame Bíbliata tüysim at suákaka am estudiáruak. Wame ówim tüysim éaka Bíbliata estudiáruame —jume ito bat katémey— júnel en énriapo itom a jojoá bénasi akima jojoay: lébelaysi. Jita tema ili obiáchitam ama tiako senútam jajáriay wanay iʼi am aʼaniay tülisi at jüne bechïbo, wanay jünakiachisi ámew tawako éntok Bíbliata jíaw bénasi wéteko akima jijióxtey. Júnelim a tojʼja ke ju Biblia ápola sïmeta yómianay, íkay ka juka lutüriata Liosta téwam éntok a Yawra bétanam yew buisʼse, éntoket jita a yabarëwi jume ówim éntok Buiata bechïbo, jáchisum ane jume kokʼkolam éntok ju esperanza jiábitewame bétana. Bem estudio juebena maxtiárim éntok costúmbrem ka türim bétana am jínew (Juan 8:31, 32).

1879ta yumayo jünekamʼme ke tiempo yúmak juka lutüriata sïmat nok bechïbo. Jumu wasúktiapo ju revista La Atalaya. Anuciando el Reino de Jehová tam yátaytek en taxti jíbam a josísime. En énriapo jume lutüriam Liosta Nokipo wëmete woy ciéntom ama woy takawa chë ama bepʼpa paísim éntok buiárampote am chíchibextia éntok woy busan ciento ama woy taká ama woy mamni chë ama bepʼpa nokimpo. ¡Jatwey june ka jumu taxti yumálatukay ju lutüria!

• ¿Jítasu síkak ju lutüria Liosta Nokipo wëmemak Crístota muksuko?

• ¿Jáchisute juka lutüriata Liosta Noki bétanate yew buisʼsek?