Jume Jehovata testígom jíbam Bíbliata maxtiárim may bexre machísima bitʼla. Junen bechïbo cúrsomim jípure wame tiempo yumálasi predikáruame bechïbo. Júnelim akímam prepararua bem ministériota tülisima wetua bechïbo (2 Timoteo 4:5).

Excuela wame Precursórim bénasi Tekipánoame bechïbo. Wepu curso busan táywarimpo wéweye precursórim regulárim bechïbo wanay Käri jak Jehovata testígom naw yayajäpo ka mekʼka katekäpo ara yatu. Ara aman kanʼnake si wepu wasúktiriam weriäteko precursórtaka. I curso yäri Jehovátaw chë jëla am rúktitua bechïbo, kéchim am aʼania chë tülisi bem predicacionta wétuanake bechïbo éntok am animamarua bem servíciopo witʼtisim jiba emo jípunake bechïbo.

Excuela ju Yáwrata bétana Evangelizadórim bechïbo. I curso woy mepʼpo wéweye wanay jume ka jubékame o ka kunákame éntok wame emo jubékame ara aman kate. Wanay 23po 65 taxti wasúktiriam weriánake, precursórim yun täyawamta jípunake éntok jakun chë tékilta béyewi bícham saka pénake. Jesús ju Evangelizador chë béxresi machi imi Buiapo anʼlame ajaria, wanay ime precursórim a bénasi emo weria bechïbo júnelim jijiá: “¡Ímine ane! Neché aman bitʼtua” (Isaías 6:8; Juan 7:29). Jakun sekäna bicha joáteseko, jámak ka jita lemaxpo béxremta jípureka jiápsana, senu cultúrawi, clima éntok tatʼtabui buáwamtaw joywánakem. Jámak ket senu nokta emo maxtiánake. Imi cúrsopo cualidádim espirituálim yöturiana imeʼe aman jak enchim bitʼtuawäpo enchim aniánake. Chë tülisem am maxtiánake Jehovata éntok a organizacionta aniá bechïbo.

Excuela Bíblica Galaad Watchtowerta bétana. Galaad noki hebréopo júnel jiawbare “tetʼta montórim testimonio bechïbo türi”. I curso 1943po nátek. Wanay náteka, jume 8.000 ama bepʼpa imi cúrsopom yew sákalame misionérom bénasi tekipánoala wanay tülisi ámew simʼla sïmat Buiapo testimóniota mákaka (Hechos 13:47). Wepu ejemplo, Perupo jume bat misionérom ama yájako, kayta congregaciónim ama ayúkay. En énriapo 1.000 bepʼpa ama ayu. Japóniwim yájako, ni kátim 10 testígomtukay. Te eni 200.000 ama bepʼpam ayka. I curso mamni mechampo wéweye, wanáyim jumuʼu Liosta Noki tüysim at suaka estudidiarua éntokim am prepararua jumu obra sïmat buiapo wëme aniánake bechïbo éntok sïmeta tülisi yew wénake bechïbo. Wame precursórim especiálim, jume misionérom territóriopom predicáruame, jume superintendéntem circuítopo aneme éntok wame sucursálimpo tekipánoame aman nénejunwa.

• ¿Jita bechïbosu yäri ju Excuela wame Precursórim bénasi Tekipánoame bechïbo?

• ¿Jábesa ara aman kate Excuélaw ju Yáwrata bétana Evangelizadórim bechïbo?