Aman bat síglopo, wepu grupo ayúkay, “jume apóstolim éntok anciánom Jerusalénpom” áney wanay imeʼe desiciónim bexre machítam nunüyey sïme juka congregación cristiánom yewpuárim bétana representáruaka (Hechos 15:2). Bempo juka Liosta Jióxterim tüysim at suákam a bíbichay éntok Liosta espíritu pámani emo wéweria nánancha éaka desiciónim nú bechïbo (Hechos 15:25). Ju grupo en énriapo ayúkame Cuerpo Gobernante bénasite a tetʼtia, alebénasim tekipápanoa.

Lios am jojótutua a wátiawta yä bechïbo. Jume sáylam yewpuárim jumu grupo Cuerpo Gobernante tiapo aneme juka Liosta Noki may bexre machísima a bitcha éntok may juniámtam jípure jita organizarua bechïbo éntok ju tékilta espirituáltam wetua bechïbo. Chikti semánampo émom naw totʼtoja jume sáylam sïmat joákame necesidádim bit báreka. Aman bat síglopo a jojoá bénasi, instrucciónimim mámaka Bíbliata wériaka, wanay cártam, superintendéntem viajántem éntok wate sáylam pámanim a jojoá. Júnelim Liosta puéblotam aʼania nanáncham énake bechïbo éntoket náwim tekipánoanake bechïbo (Hechos 16:4, 5). Bempo ketchi, juka espiritualméntepo ámew bëyeme listatarua, ket am animarua predicacióntam púxbaw bicha a wétuanake bechïbo éntok si wepu sayla responsabilidad bemélata a mak barëteko bempo akima susuaya.

Liosta espíritu jiaw pámani émom wéweria. Ju Cuerpo Gobernante wa sïmem bepʼpa nésaweme, Jehovata, guiámim jajaria, éntoket wa congregacionpo Koba yöweme, Jesús (1 Corintios 11:3; Efesios 5:23). Wame ama aneme kátim Liosta puéblowi emo koba yöwele. Imeʼe wate cristiánom yewpuárim bénasim ket “Kabárata [Jesústam] guojaaseme ják júne ä hueramäpo” (Revelación 14:4). Ju Cuerpo Gobernante may itom a baysawʼwe oraciónim ame bechïbo itom jówawi.

• ¿Jábesamʼme wame aman bat síglopo sïme congregaciónim susuáyame?

• ¿Jáchisu ju Cuerpo Gobernante en énriapo Liosta guiámim jajaria?