Jesús ketune ke mukeka, júnel jiawa: “Ïri evangelio [Liosta Yawra bétana], sïme ániat jiápsammeu noknaa; bueïtuk jume naciónim ä [jikʼkaixnake] béchïbo. Huanäi beja yumáke ániata lütinakëhui” (Mateo 24:14). ¿Jáchisuma wériwnakey jäni ika predicacionta sïme ániapo? Jesusta a yákaw bénasi imi Buiapo werámako (Lucas 8:1).

Jume géntem bem joápote am visitatarua. Jesús a discípulom maxtiak jáchisum jume tü Nókim Liosta bétana joáwam békana predicáruanakey (Mateo 10:11-13; Hechos 5:42; 20:20). Ime bat evangelizadórim territóriomim mákwak wanay akímam téxwak jakun táxtim jíbam predicáruanakey (Mateo 10:5, 6; 2 Corintios 10:13). Júnel bénasi, en énriapo itom predicación tülisi yäri, jume congregaciónim territóriomim am makʼla ama predicáruanake bechïbo. Júnel ara Jesusta nésawtate nokjikʼkaixna ke géntetaw predicación pámani testimonio yumálasi am máknake (Hechos 10:42).

Géntemte jariwbare jakun am anëwi taxti. Jesús jak juebena géntem naw yayajäpo predicáruak, bawe mayoachi éntok noria sïme a atʼtiakapo, júneli apo wepu ejémplota itom makʼkak (Marcos 4:1; Juan 4:5-15). Ítapo ket ale bénasi jakun júnete Bíbliata bétana etʼtetexwa: boomʼmechi, jak jita nenénkiwapo, párquempo éntok teléfono pámani. Ketʼte wame ítot chíkola joákame, itómak tekipánoame, wame itómak excuélame éntok itom wawájim testimóniota itom feta bétanate am mímika ama yumáteko. Wanay ia pámani juebena géntem sïmat ániapo joákame “jume tü nókim jinewʼwame bétana” jikʼkaixna (Salmo 96:2).

Jábetache eyʼya türi nókim Liosta Yawra bétana aw nok bechïbo éntok jáchisu jiaw bare a bechïbo púxbaw bicha. Ka jiba emo bechïbotunake i mensaje esperánzata mákame. Ama yumáteko watemʼmew a nokná.

• ¿Jita “tü nókim” aika nok bechïbo?

• ¿Jáchisute jume Jehovata testígom Jesusta predicáruakaw bénasite predicacarua?