Ju “tü nokta [...] sïme naciónimmehui, famiiliammehui, tattäbui nokta nokammehui, entok pueblommehui” ámew weriw bechïbo, publicaciónim woy busan ciento ama woy taká ama woy mamni nokímpote am jojoá (Revelación 14:6). ¿Jáchisute i may buewru tékilta jojoá? Sïme géntem aniat aneme nawlópola aneka publicaciónim jíjioxte, büru éntok am kuakʼkuaktia éntok sïme Jehovata testígom.

Ju jióxteri bat yäri inglés nokpo weye. Ju Cuerpo Gobernante Departamento publicaciónim Jióxtewapo, o redactórim, tékiltam supervisasarua, iʼi oficínam principálim Jehovata testígom jípurepom katʼtek. I departamento at suuwa jachin tékiltam jowa jume redactórim imi oficínampo éntok wate sucursálimpo aneme. Wanay wepu equipo may buéwruta jípureka bechïbo juebena témam éntok tatʼtabuiasi cultúram bétana árate noka, junen bechïbo itom publicaciónim sïme paísim bétana nonókamʼme.

Ju jióxteri kuaktialéromewi bibitʼtuawa. Ju beja jióxteri éntok jewíteriataka, jume kuaktialero sïmat ániapo ayúkame computadóram pámani ámew bibitʼtuawa, wanay bempo am kuakʼkuaktia, kéchim tüysi at suaka am bíbicha éntok si ka tülisi yáritaka tawako akima tutüte. Jume a kuakuáktiame utʼtiatam jojoá “tuá nókim lutüriata nokame” yew puá bechïbo júneli witʼti juneaka tatawa ke ju kuáktiary tuärim inglesta a jiaw bénasi jiáwnake (Eclesiastés 12:10).

Computadóram pámani chë láwtipo ara yatu. Wepu computadora kara jioxte éntok kara kuáktiarim yawʼwa, te wepu gente alʼla. Te, chë láwtipo ara yatu diccionáriom bíchaka, jita itom aniame nókitat jüne bechïbo o jita libro junʼne computadórapo wëme. Jume Jehovata testígom wepu Sistema Electrónico de Edición Plurilingüetate yala (éntoket MEPS bénasi täyawa buéytuk jume síglam inglés nokipo ajäria), wanay ia pámani computadórapo juébena nokimpo árate téxtota ama jioxte, ket jume jióxterim jiyókarimak akima oʼore chúkula éntok ara imprimíruatu.

¿Jatchiákate yun utʼtiata jojoá, eláposu jume nókim itom kuátiakame ka jayki géntem a noka junʼne? Buéytuk Jehová a watia ke “sïme yoremem [emo] jínëu ïaa, entok lútüriata am täya ïaa” (1 Timoteo 2:3, 4)

• ¿Jítasute jojowa itom publicaciónim jióxte barëteko?

• ¿Jatchiasu juebena nokímpote am kuakʼkuaktia?