Wepu desastre naturalta siko, jume Jehovata testígom láwtipote jítate jojoá itom sáylam jita ámew bëyeme aniá bechïbo. Iʼi a bitʼtebo ke tuate ito nakʼke (Juan 13:34, 35; 1 Juan 3:17, 18). ¿Jáchisute am aʼania?

Tómimakte am aʼania. Wepu buewru tébay Judéapo sikäko, jume cristiánom Antioquíapo joákame tómitam bibitʼtuak bem sáylam espirituálim aniá báreka (Hechos 11:27-30). Júnel bénasi, itom sáylam jakun junʼne imi ániapo joákame jita juena ámew sikäko, ítapo tómitate ámew bibitʼtua itom congregaciónim pámani am aniá báreka (2 Corintios 8:13-15).

Am aniá báreka ámante sásaka. Jume anciánom desástreta sikäpo aneme sïme jume sáylam congregacionpo jomémem jajaria wanay akima bíbicha ke tülisim anʼnake. Jámak wepu comité jábem aniame a organizáruanake jáchinim buáwamta, baʼam éntok sánkota am máknake o si wepu lotor ámew bëyeyo éntok jákunim bem tawanakëwi járiwrianake. Jume Jehovata testígom sïme juka tékilta bétana täyame ámanim sásaka am aniá báreka, buéytuk jume sáylam kärim o Käri jak Jehovata testígom naw yayajäpo tüte bechïbo. Buéytukte nawte ane éntok beja ia bénasi siko nawte tekipánoala, junen bechïbo, necesidadta ayuko láwtipo nólikisite aʼane am aniá báreka. Yö lutüriapo, ítapote “huame Crístota súalhuäpo itómak hueerim” aʼania, te si ama yumako watemte ket aʼania, eláposu jita religión bem jípurew junʼne (Gálatas 6:10).

Átam aʼania espiritualméntepo éntok utʼtiatate am mámaka. Wame desastre naturalta sikäpo aneme tüysi ánimo ámew bëye. Jumu tuá, Jehová, “jiápsi yejtehuäpo Dios” utʼtiata am mámaka (2 Corintios 1:3, 4). Junen bechïbo, wame rojíktisim áneme jume promésam Bíbliapo wémetate am bibitʼtua, imeʼem itom asegurarua ke ju Liosta Yawra jume jita ka tüwata itom jiökot étuame abe am lütia (Revelación 21:4).

• ¿Jatchiásute jume Testígom láwtipom nólikisim aʼane wepu desastre naturalta sikäteko?

• ¿Jáchisute espiritualméntepo tülisi am étuana wame jiápsaka ama tawákame?