Juebena géntem akima suale ke ítapo jume Jehovata testígom wepu religión bemélate. Júnentak junʼne, chë woy mil seteciéntom wasúktiriam amaw bicha, wame Lios tuá lutüriata tekipánoalerom a “testígom” bénasim am täyay (Isaías 43:10-12). Ketune ke 1931yo Liosta Noki estudiántem bénasite täyaway. ¿Jatchia éntok Jehovata testígomte téwataytek?

Buéytuk am jünetua jábesa itom Lios. Ju Liosta téwam, Jehová, juebénasi Bíbliapo weyʼye, jachin jume antíguom jióxterim a bitʼtebo bénasi. Juebena Bíbliampo, Liosta téwam wenakëpo Senyor o Lióstam ama yéchala. Te ju Lios lutüria Moiséstawi Jehová bénasi aw presentáruak wanay júnel aw jiáwak: “Iʼi jiba bechïbo in téwatuna” (Éxodo 3:15, TNM). Júneli aw yew bítʼtebo wate liósim ka lutüriam bepʼpa, ítapo mayte ito utʼtile a santo téwam wériaka.

Buéytuk itom tékilta chë bexre machísite a bibitʼtua. Justo Abéltamak náteka juebena géntem yéwim katʼtaytek wanay bempo a feeta Jehovátat bem jipurëwim tatäyatuak. Síglom weyo, wátem ket júnel a yawʼwak, Noeta bénasi, Abrahám, Sara, Moisés, éntok David imeʼe juebena testígomʼmewim chätuk (Hebreos 11:4–12:1). Jachin wepu testigo jumu tribunalpo wepu génteta kayta cúlpakame a nokʼriako bénasi, ítapo ket juka desicióntate nüla, watemʼmew juka lutüriata itom Liosta bétana am täyatuana.

Buéytuk Jesusta bénasi ito weria. Ju Biblia Jesusta bétana íkay jiawa ke “äpo witʼti nonoka éntok lutüriata” (Revelación [Apocalipsis] 3:14). Apo junen jiawa ke Átchaywata téwam täyatuak ket junen jiawa ke abo sika juka “lútüriata [Liosta] bétana ín noknakë béchïbo” (Juan 17:26; 18:37). Junen bechïbo, jume tuá a discípulom a téwamte usáruana éntok a bétana noknake. Jume Jehovata testígom utʼtiatate jowa íkay yä bechïbo.

• Si ítapo Bíbliam estudiántem téwamtate jípurey, ¿jatchiásute ente Jehovata testígom téwamtate nüka?

• ¿Játwey náteka Jehová imi Buiapo testígom jípula?

• ¿Jabe chë sïmem bepʼpa Jehovata testígotula imi Buiapo?