¿Jume retrátom imi follétopo wëmete bitʼla jachin jume Jehovata testígom may tülisi ito yálataka reunióniw sásaka? ¿Jatchiásute may ito susuaya jachin itom sánkonakëwi éntok jachin itom listáruanakëwi?

Itom Liosta yöreka bechïbo. Yö lutüriapo Lios ka lemaxpo at suuwa jachin itom sasánkokäwi, ni jachin ito nunüyewi (1 Samuel 16:7). Júnentak junʼne, naw ito totʼtojako Liosta adorarua bechïbo, tuá yöriwamtate a mak peyʼya éntok itom sáylamʼmew ketchi. Si wepu juéztaw wébarëteko, jámak tülisi ito yálataka awte we bánake buéytuk ju tékilta a jípurewte yöre. Júnel bénasi, jachin itom listáruawi reunióniw we bechïbo a bitʼtebona ke ju “Juez sïmat buiachi”, Jehová Lióstate yöre, éntok jumu jak itom naw totʼtojapo a adorarua bechïbo ketchi (Génesis 18:25).

A bitʼtebo bechïbo juka Bíbliapo itom täyakawi. Ju Biblia junen jiawa ke jume cristíanom “huéchiasim émo sánkotuanake, émo yöriwä pámani” (1 Timoteo 2:9, 10). “Huéchiasi” ito sánkotuako júnel jiáwbare ke itom sanko ka lemaxpo béxrena éntok ka kutʼtilana o pochisi itow tawana. Wanay ju noki “émo yöriwä pámani” júnel jiáwbare ke uxyolísite ito sánkotuanake, ka jachin junʼne éntok ka junʼnerasi. Eláposute ime nésawrim weriäteko junʼne, árate a yew puwʼwa jachin itom sánkobarëwi. Úxyolisi éntok tüysi ito alistáruako “sïmeku jü Diosta bétana yore majtiahuame [...] üjyorisi bittunake”, wanay júnel árate Liosta glorificáruana ka nokaka (Tito 2:10; 1 Pedro 2:12). Tülisi ito yálataka reunióniw sikäteko, jume géntem Jehovata pueblo bétana tülisim noknake.

Límpiosi éntok tülisi ito bitʼtebo bechïbo ka sanko lemaxpo béxrena o ka tuá finótuna. Junen bechïbo, kate emo tojʼja ke juka imi en tayakäwi sánkota bétana enchi a taktíriana Käri jak Jehovata testígom naw yayajäpo we bechïbo.

• ¿Jatchia tüysi béxresi machi ke tülisi ito sánkotuana Liosta adoráruako?

• ¿Jita nésawri itom aniánake a yew puá bechïbo jáchinte ito sánkotuanake?