Betel wepu téwam hebreo “Liosta Käri” jiáwbare (Génesis 28:17, 19). I may tü téwam jume edifíciom Jehovata testígom sïmat buiapo itom jípurewi bechïbo wanay jumu bétana predicacióntam wéweria éntok akima aʼania. Ju Cuerpo Gobernante oficínam principálimpom ane jumu Nueva Yorkpo (Estados Unidos) kátekame, wanay jumu bétana sucursálim juebena paísimpo ayúkame bem jowáwimtam susuaya. Sïme jume sáylam imi jak tekipánoame familia Betel bénasim täyawa. Wepu tuá familia bénasim buéytuk bempo naw jijïbua, náwim jowa, naw tekipanoa éntok naw aneka Bíbliatam estudidiarua (Salmo 133:1).

Kayta wepu lugar a bénasi ayu buéytuk sïme ama joákame námakasim tekipápanoa. Sïme famíliam Betélpom ówim éntok jámuchim may espirituálim ama jowa, bempo tiempo yumálapo Liosta wátiamta yä báreka ama ane éntok Liosta Yáwrata tekipánoaria bechïbo (Mateo 6:33). Kabe ama bebéxtuawa, te, sïme jakun bem tawanakëwi éntok buáwamtam mámakwa, éntok ili tómitam mímikwa jita bem nesitáruawi emo jinʼnuria bechïbo. Wewëpulayka wepu tékilta bem yanakëwim makʼri: wate oficínampo, cocina o jak jijïbuawapo; wate éntok impréntapo o wepu taller líbrom pástam oreriäpo tekipapánoa; éntok wátem cuártomim tutüte, jumu sánkota jíjipaksiapom ane wáteka jita jumu ama nasónterim tutüte, éntok chë yun jítapo.

Wepu lugar yun tékilta ayukäpo predicacionta Liosta Yawra bétanam aʼania. Betelta bechïbo may bexresi machi ke jú lutüria Liosta Nokipo wëme sïme géntemʼmew yumánake. I folleto wepu ejemplo ia bétana. Akima jióxtek ju Cuerpo Gobernante a supevisáruaka, wanay computadóram pámani juebena kuaktialero sïmat ániapo ayúkamewim bibitʼtuawa, chúkula, juebena paísimpo máquinam nólikisim tekipápanoamepom yarimʼme wanay wepu ciento ama diez mil congregaciónim bepʼpapom chíchibextiawa. Sïmepo, jume famíliam Betélim juka tékilta may bexre machítam apoyayarua: jume tü nókim Liosta bétana predicacionta (Marcos 13:10).

• ¿Jábesamʼme wame Betelpo tekipánoame, éntok jítasu ama mímikwa?

• ¿Jita tékiltam bexre machítam aʼania sïme bem jowáwimak Betélimpo?