Aman bat cristiánom tiémpopo bem reuniónimpo buibuíkaymey, oraciónimim jojoay jume jióxterim Liosta bétanam leleéruay éntok tüysim at suaka am estudiáruay (1 Corintios 14:26). Wanay empo itom reunióniw nóyteko, jita ale bénase ama binʼnake.

Maxtiárim tüysi türim Bíbliata bétana yew nürim ama mamáxtiawa. Sábala o lomínkopo, sïme congregaciónim émom naw totʼtoja wepu etʼtexwari Bíbliapo yew nüri treinta minútompo nonókwame jikʼkaix bechïbo, wanay ia pámani itom maxtiá jachin ju Liosta Noki itom jiápsimak naw aw weria éntok jume tiémpom itom jiápsamakim. Sïme ama aneme nenéjumwa jume téxtom ama nonókwame bem Bíbliampo am leéruanake bechïbo. Chúkula éntok ju revista La Atalaya estúdiotam wéwetua, iʼi wepu horapo wéweye, jumürim wepu artículo ika revístata wériame estudiáruawa wanay sïme ama aneme nenéjumwa ama nok bechïbo. Ju estudio ika revista La Atalaya bétana, itom maxtiá jáchisute am wétuana jume tü conséjom Liosta Noki mákame itom jiápsipo. Jumu ciento diez mil bepʼpa congraciónimpo sïmat Buiat ayukäwi mísmotam estudiarua.

Itom aʼania wátem chë tülisi am maxtiá bechïbo. Ket wepu tukata semánata násuk wémepote ito naw totʼtoja wepu etʼtexwarita wetua báreka wanay baix nánaykimtewa, Vida y Ministerio Cristiano téwakame, ju publicación chikti mepʼpo yew sisímeme Guia de actividades para la reunión Vida y Ministerio Cristianos bechïbo pámani jojowa. Ju bat wëme etʼtexwari, “Tesoros de la Biblia” tetʼtiawame itom aʼania jita lébelay Bíbliapo wëme itom joapo leéruakäwi chë at jüne bechïbo. Chúkula, jumu etʼtexwaripo “Seamos mejores maestros” itoma bibitʼtua jachin wate géntemʼmew Bíbliata bétana ámew nokna. Wanay wepu sayla am tetʼtexwa jachin chë tülisi leéruanake éntok noknake bechïbo, wanay juʼu sïmemʼmewi tüysi itow wéweche (1 Timoteo 4:13). Últimopo, jumu “Nuestra Vida Cristianapo”, ata bíbicha jachin jume conséjom Liosta Nokipo wëme itom jiápsapote am wétuanake. Imiʼi chëte at jünenea Bíbliatachi nátemaixrim éntok yómiamʼmak tüysi at suaka am bíchaka.

Itom reunióniw sikäteko, ákea türeka tawana buéytuk ache suana ke máyim tülisi Liosta Noki bétana ama mamáxtiawa (Isaías 54:13).

• ¿Jítase ama tewna jume Jehovata testígom reuniónim nóyteko?

• ¿Jita reunióniw semánapo jojówame bache we peyʼya?