Jesús ka watem géntem bénatukay. Ketune ke imi Buiäpo yoreka aman téwekapo joaakay äpo wepu espíritukay (Juan 8:23). Jehová Jesusta bat yawʼwak, wanay Jesús aʼaniák sïme jita ya bechïbo. Jume Bíbliam júnel jiawa ke Jesús “äpola jibʼba” Liosta uʼusi buéytuk kabe aʼaniaka yawʼwak (Juan 1:14). Ket Bíbliapo akim a “Nooki” tiyʼya buéytuk äpo watem Liosta wátiaw tetʼtexway. Proverbios 8:22, 23, 30 éntok Colosenses 1:15, 16te nooka.

Lios a usíwata Buiaw bitʼtuak. ¿Jáchisu a yawʼwak? Jehová wepu ili jamʼmut beme Judata tribu bétana wëme María téwakamta a tómapo Jesusta jiápsita yéchariak. Te kabe owta imi Buiäpo joakamta átchayekay (Lucas 1:30-35). Äpo Buiaw kom sïka baix razónim bechïbo: 1) Liosta bétana lutüriata maxtiá báreka, 2) ítom maxtiá jachin a jiápsakawi jita Liosta ítow awamta ya bechïbo eläposu a obiächituk junʼne, éntok 3) a jiapsi ka jiobʼrim jípuremta mik bechïbo wanay júnel ara ítom jínewna. Marcos 10:45te nooka.

Batnätaka si wepu gente jita ka tüwata yäko áram a meʼay a castigarua bechïbo, te amakweyo ara aw jíneuy a jiápsita béxreta béxtuaka (Éxodo 21:29, 30). Lios génteta yäko ka am olasi ayuiʼay ni ka am kokʼkoiʼay. Íkay te juneyʼya buéytuk Lios Adántaw júnel jiawlátukay ke si ka a nokjikʼkajateko, muknákey. Te si, a nokjikʼkajateko jatwey june ka mukeyʼyey (Génesis 2:16, 17; 5:5). Bíbliata jiaw bénasi sïmetakate pecadórim buéytukte Adántat yew sákala ia bechïbote kokokʼko. Wanay jabe ítom jínewnakeme bëyey. Romanos 5:12 éntok 6:23te nooka.

 ¿Jábesu a jiápsita makeyʼyey kokʼkowamta bétana ítom jínew bechïbo? Ju kokʼkowame wepu castigo ítom pecádom bechïbo. Buéytukte sïmetaka pecadórim kabe a jiápsita ara makʼka watem pecádom jiökorinakew bechïbo. Salmo 49:7-9te nooka.

Ítapote pecadórim, te Jesús eʼe éntok äpo jatwey june juka ka tüwata ka yawʼwak. Junéntak äpo ka a pecádom bechïbo muukuk, sino wate géntem pecádom bextua báreka. Lios a Uʼusita ítom bechïbo a muknákew bitʼtuak wanay júnel a bitʼtebo ke tüysi ítom nakʼke. Éntoket Jesús ítow nakta yew bitʼtuak a Átchayta nokjikʼkajaka éntok a jiápsita ítom bechïbo makʼkak pecado éntok kokʼkowamta bétana ítom jínew bechïbo. Juan 3:16 éntok Romanos 5:18, 19te nooka.

Vidéote bitcha ¿Jatchiakasu muukuk Jesús?

Jesusta imi buiäpo jiápsako jume kökoreme jitʼtok, kokʼkolam jiaabitetuak éntok jume jiökot eame aniak, wanay júnel a yew a bitʼtua jita púxbaw bicha yänake jume Liosta nokjikʼkajame bechïbo (Mateo 15:30, 31; Juan 5:28). Jesusta mukuko, Lios a jiaabitetuak wanay juchi téwekaw espíritu ténasi jiápsak (1 Pedro 3:18). Chúkula éntok Jesús a Átchayta bátanäpo yéxtek a böbíchaka yaʼut ténasi a yéchanakew taxti géntem Buiäpo jiápsamʼmet nésaw bechïbo (Hechos 2:34, 35). En énriapo Jesús téwekapo nésawe, éntok ime jita türim jume a wojäseme sïmat Buiäpom a etʼtexwa sásaka. Daniel 7:13, 14 éntok Marcos 13:10te nooka.

Juka nésawri Liosta a makakäwi, i Yaʼut tüysi utʼtiakame lawti géntem ka tülisi emo wériame lütiana júnel bechïbo kabe jiökot ënake. Sïme jume Jesústat feeta oʼoreme éntok a nokjikʼkajame imi Buia musälamachisi yäripo alʼleakam jiápsana. Salmo 37:9-11te nooka.