Lios sïme jita ayúkamta yäla. Jiba jatwey bétana jiápsala éntok jiba bechïbo jiápsana (Salmo 90:2). A bétanam weyʼye jume tu nookim Liosta Nokipo wëme (1 Timoteo 1:11). Buéytuk jiápsiwamta ítom makʼla, júnel bechïbo äporit jíbate tekipanʼnoariana éntok adoraruana. Apocalipsis 4:11te nooka.

Kabe géntem jatwey june ka a bitʼla buéytuk äpo ka ito bénak takáwak. Äpo wepu espíritu éntok che ito bepʼpa utʼtiak (Juan 1:18; 4:24). Te árate juneyʼya jachin eyʼya éntok inʼnea a yälamta bíchaka. Iachere suuwa: jume juebena taakam éntok seewam yälawi ítow a nakta yew bitʼtua éntoket tüysi juuneamta jípure. Éntoket, sïme ániapo yälawta ítow a yew bitʼtua ke tüysi utʼtiarata jípure. Romanos 1:20te nooka.

Ket Liosta täya bechïbo a Nokimte noknake. I ítow a bitʼtua jachin géntemʼmak aw nüye, jita a türewi éntok jita eʼe, éntok jita a jojoäwi géntem tülisi éntok ka tülisi emo nüyeyo. Salmo 103:7-10te nooka.

Jesús júnel jiawa: “Ítom Átchay téwekapo kátekame, sïme em téwam yörina” (Mateo 6:9). Eläposu Liosta “Átchay” o “Senyor” bénasi ara tewa, te äpo wepu téwam jípure. Yoremʼnokpo Jehová, te wate nokimpo täbuiasi jikʼkaitu. Ju Liosta Noki junen jiawa: “Jume géntem juunenakew bechïbo ke empo, Jehovame téwak, sïme buiat bepʼpa nésaweme” (Salmo 83:18 [82:19 wate Liosta Nokimpo]).

 Juebena Liosta Nokimpo, Jehovata téwam ama wenakëpo Lios o Senyor tim ama yéchala. Bat Liosta Nokim jióxteko Liosta téwam batʼte siete mil núkisim ama weyʼyey. Jesús géntem Liosta bétana am maxtiako, ime téwam elaka jiba am tetʼteway. Juan 17:26te nooka.

Si Jehová lutüriapo ítom nakʼke, ¿jatchiaka ka tüwamta ka lütia? Wateka akim a suale ke jiökot ítom eʼetua a bit bechïbo si te a nok jikʼkaixna. Te ju ka lutüria. Santiago 1:13te nooka.

Jehová ítom a yew a puaiʼa jita ítom jiápsamak yänakewi. Che türi a tekipanoawamta yew puako (Josué 24:15). Junéntak, juebena géntem juka ka tüwamta yäbare, wa bechïbo juebena jiökot ëwame aayu. Te Jehová rorojikte géntem jiökot eamta bíchaka. Génesis 6:5, 6te nooka.

Jehová ítom nakʼke éntok alʼleaka ítom jiapsiʼia, wa bechïbo ka jaikika bëye jiökot ëwamta éntok ka tüwata lütia bechïbo. Te tu razónim jípure ketune ke jiökot ëwamta lütia bechïbo. Jumu páginam 16 éntok 17po ia bétana etʼtexwa. 2 Pedro 2:9 éntok 3:7, 13te nooka.

Jehová ara ítow au rúktitua oración pámani. Äpo wewʼwepulaim ítom aniabäre (1 Juan 5:14). Lios ítom jiökoribäre éntok at susuá juka utʼtiata ítom joamta a wátiaw ya bechïbo, eläposu amakweyte ka sïme ito bétana watiamta yäko. Eläposute jijʼjiobe äpo ara ítow jëla äne. Salmo 103:12-14 éntok Santiago 4:8te nooka.

Buéytuk Lios jiápsita ítom mikʼla, sïmem bepʼpunete a nakpo yumala (Marcos 12:30). Ata yew bitʼtua ke te a nakʼke a bétana ito maxtiako éntok a nésawrim nokjikʼkajateko. Íkay yäko, chëte aw jëla anʼnake. 1 Timoteo 2:4 éntok 1 Juan 5:3te nooka.