Jehová ju Lios alʼleame ajaria, wanay juebena tu nookim a bétanam weyʼye. Júnel bechïbo äpo jume famíliam alʼleiʼa (1 Timoteo 1:11). Äpo matrimóniota yawʼwak. Si ju oʼow éntok ju jamʼmut juéztaw emo jubeko, bempo éntok bem uʼúsim alʼlena éntokim nákwam bénasim emo ériana. Jume cristíanom yáwram bem pueblo joakapo ayúkame nokjikʼkaixna. Ime am téxwana jachin emo jubnake matrimonio jiosiam jípunakew bechïbo Lucas 2:1, 4, 5te nooka.

Lios owta éntok ju jamutʼta emo jubʼlame jiba bechïbo naw am aniʼa. Jehová júnel a waatia ke ju jubiari éntok ju kunaria kátim watemʼmak weramna (Hebreos 13:4). Divorciota kuxtire (Malaquías 2:16). Te Lios tülisi a bitcha juka divorciota si kunaria o jubiari senúmak böteko. Íkay sikako, wa ka kúlpata jípureme ara aw divorciaruana éntok júnel a wätiateko ara juchi jubnake o kunana. Marcos 10:6-8, 11te nooka.

Jehová owta éntok jamutʼta yawʼwak matrimóniopo naw emo aniaiʼaka (Génesis 2:18). Ju oʼow a joäpo nésawe, wa bechïbo äpo tekipanʼnoana juka famíliata jïbuatua bechïbo éntoket Liosta bétana am maxtiapo yumala. Ju oʼow jita che a türewta toixbänake a jubiawata alʼletua báreka, buéytuk a nakʼke. Jume emo jubʼlame émom náknake éntok emo yörina. Jume náwichikam jijʼjiobe, wa bechïbo nanáncham emo jiökorina alʼlewamta jipu bechïbo. Efesios 4:31, 32; 5:22-25, 33 éntok 1 Pedro 3:7te nooka.

Si jume emo jubʼlame problémam jípurëtek, náwichikam utʼtiatam yäna nákeka naw emo nu bechïbo (1 Corintios 13:4, 5). Ju Biblia ka a türi tiyʼya ke jume emo jubʼlame émom toíxnake jume problémam matrimóniopom jiba aʼayume tüte bechïbo. 1 Corintios 7:10-13te nooka.

Jehová jume uʼúsim alʼleiʼa. Wa bechïbo, Jehová jume jübua yötume am maxtiá jachin alʼlewamta jípuna. Éntoket a waatia ke bem átchayriam bétana emo maxtiana buéytukim chërim ame bepʼpa jita täya éntok jiápsala (Colosenses 3:20). Éntok Jehová uʼúsim alʼleiʼa a wátiaw yäko éntok a Uʼusi Jesucristo wátiaw ketchi. Eclesiastés 11:9—12:1; Mateo 21:15, 16 éntok Marcos 10:13, 14te nooka.

Jume átchayriam sïme ame bétana wémtam yänake bem usíwam buawamta, kárita éntok sánkota am mak bechïbo (1 Timoteo 5:8). Te ju ka sïme. Ket am maxtiana jachin Lióstam náknake éntok jachin ale bénasi emo nünake (Efesios 6:4). Jume átchayriam Liosta bem nákew yew bitʼtüteko jume uʼúsim kéchim a ya bänake. Bempo Bíbliam bétana am maxtiäteko jume usíriam chërim tülisi ara pensaruana. Deuteronomio 6:4-7 éntok Proverbios 22:6te nooka.

Jume usimʼmew bëye ke jume átchayriam tülisi am ëtuana éntok ket am utʼtilna jita türi bem yäkaw bechïbo. Amakweyo béxresi machi ke am téxwana ke bem yäkaw ka türitukay wanay am castigaruana, buéytuk júnel jita ka dányota ámew joámtam yänake (Proverbios 22:15). Ili usita castigaruako ka jiökot a yäna. Colosenses 3:21te nooka.

Jume Jehovata testígom yun líbrom yäla jume átchayriam éntok jume uʼúsim bechïbo. Sïme Bíbliapom yew nüri. Salmo 19:7, 11te nooka.