LECCIÓN 8
¿Jatchiaka Lios ka tüwamta éntok jiökot ëwamta kiélam bitcha?
1. ¿Jáchisu yew sïkak ju ka tüwame?
Juka tiémpota Liosta jume oowim nésaw toíxlawi a yew bitʼtua ke kátim jume problémam ara tüte
Ju ka tüwame Buiäpo yew sïkak Satanasta bat ara nokichiäta nokako. Äpo wepu ángel ka pecadórtukay, te ka Liosta maxtíriam nokjikʼkajak (Juan 8:44). Äpo aw adoraruaiʼay, te Jehová júkay deréchota jiba jípure. Satanás Evata baitäwak Liosta ka nokjikʼkaiʼiaka. Wanay äpo Satanasta nokjikʼkajak. Adán a jubíamak chätuka ket Liosta ka nokjikʼkajak. Adanta yäkaw bechïbo ju jiökot ëwame éntok kokʼkowame ayutáytek. Génesis 3:1-6, 19te nooka.
Eva ju bat gente Liosta ka nokjikʼkajakame. Wanay näteka Satanás kaabem Liosta nokjikʼkaiʼa Yaʼut ténasi. Eläposu Jehová sïmem bepʼpa utʼtiak, Satanás júnel jiawa ke Lios ka úkay deréchota jípure. Batʼte sïme géntem Diablotámak chätula Liosta nésawta ka wätiaka. Wa bechïbo Satanás imi “Buiäpo yawra” (TNM). Juan 14:30 éntok 1 Juan 5:19te nooka.
2. ¿Jiöbek Lios ángelim éntok génteta yäko?
Jehovata yäkawi tülisim yäri. Jume bat géntem éntok jume ángelim áram Liosta sïmepo a nokjikʼkajay (Deuteronomio 32:4, 5). Äpo libertata ítom makʼla jita türi éntok jita ka türita yew pua bechïbo. Buéytuk Lios ka utʼtiapo ítom a nokjikʼkaiʼia. Junen bechïbo ítapo a nookim nokjikʼkajateko ata yew bitʼtuana kete a nakʼke. Santiago 1:13-15 éntok 1 Juan 5:3te nooka.
3. ¿Jatchiaka Lios juka jiökot ëwamta kiela bitcha?
Eläposu juebena géntem Liosta ka nésawiʼa, ilikʼki tiempo bëye ke äpo a saayom lütiana. ¿Jatchiá yun tiémpota bobitʼla? A yew a bitʼtua báreka ke ju oʼow ka tülisi nésawla buéytukim a kóptiala (Eclesiastés 7:29; 8:9). Jume oowim busan mil wasúktiriampo nésawla, te kátim ama yumala jume injustíciam, ebʼbualerom, jábem meʼame, naw nasʼsuawamta éntok kökuam uwʼwa bechïbo. Jeremías 10:23 éntok Romanos 9:17te nooka.
Liosta ítot nésaweyo, jita türitate mabetna (Isaías 48:17, 18). Ka jaikika bëye Jehovata jume géntem énriapo nésaweme am lütia bechïbo. Jume géntem Liosta Yautʼtamak aneme jiba Buiäpom jiápsana (Isaías 11:9). Daniel 2:44te nooka.
4. ¿Jáchisu tülisi ítow wetche ke Lios ketune ke i ániata lütiala?
Satanás júnel jiawak ke jume géntem Liosta tekipanoáriana buéytuk a bétana jita türik mábet báreka. Lios yun tiémpota böbitʼla i ániata lütia bechïbo, te i tülisi ítow wetche, buéytuk júnel sïmetakate ara jachin ítom jiápsapo a yew bitʼtua ke ju Diablo kie ara nokïchi éntok árate a bitʼtebo ke Liosta Yawramakte äne, ka owim nésaw pámani. Job 1:8-12 éntok Proverbios 27:11te nooka.
5. ¿Jáchisute Lióstamak anʼnake?
Ítom yärimʼmakte a yew bitʼtua site Liosta nésawta waatia o eʼe
Batʼte ito maxtiana jáchinte a adoraruana Bíbliam maxtiaw bénasi wanayte a yäna (Juan 4:23). Jesusta bénasi ito weriäteko, ata bitʼtebo kete ka Satanasta yáwramak äne, wa bechïbo porítikapo éntok naw nasʼsuawapote ka ito kibáchana. Juan 17:14te nooka.
Satanás a utʼtiarata usarua jume géntem jita ka tüwata yaiʼaka éntok bempörim kökosi emo yaiʼaka. Jita tüwata ya báreteko pueke jume amígom éntok wawájim ítom junʼneriana o ítom jiápsita obiächisim a yäna (1 Pedro 4:3, 4). Juka pasäruateko, jume géntem Liosta nákemete járiwna éntok jume yuktírim Bíbliampo wëme te nokjikʼkaina. Íkay yäko, ata bitʼtebona ke Satanás ara nokíchiam nookak júnel jiayo ke kabe Liosta ara nokjikʼkaja yun jita ka tüwata aw wëyo. 1 Corintios 6:9, 10 éntok 15:33te nooka.
Ju nákwame Liosta ítow jípurewi ítom a juunetua ke jiökot ëwamta éntok ka tüwata lütiana. Wame Lióstat bétana emo oʼoreme ákim a yew bitʼtua ke feetam jípure, wanay ime jiba bechïbo Buiäpom jiápsana. Juan 3:16te nooka.
