LECCIÓN 7
¿Jítasu ju Liosta Yawra?
1. ¿Jítasu ju Liosta Yawra?
¿Jatchiá júnel ara jiautu ke Jesús sïmem bepʼpa che türi nésaw bechïbo? (MARCOS 1:40-42)
Wepu yawra téwekapo kátekame ajaria i sïme jume yáwram imi Buiäpo ayúkame uwʼwana wanay sïme Buiat nésawnake. Liosta wátiaw imi Buiäpo yäna aman téwekaw bénasi. Ju Liosta Yawra tua géntem aniana, wanay sïmem suamsi naw jiápsatuana. ¡Lutüriapo may tu nokimʼme! Lucas 1:33; 4:43 éntok 11:2te nooka.
Buéytuk sïme yáwrapo jabe ama nésawnakeme bëye, Jehová a Uʼusi, Jesucrístota, ama yéchala a Yáwrapo a nésawnakew bechïbo. Apocalipsis 11:15te nooka.
2. ¿Jatchiaka Jesús che sïmem bepʼpa türi nésaw bechïbo?
Ju Liosta Uʼusi che sïmem bepʼpa türi nésaw bechïbo, buéytuk may tu yóreme éntok jiba witʼtílasi aw wéweria (Mateo 11:28-30). Éntoket, utʼtiarata jípure géntem aniá bechïbo wanay a usáruana téwekaw bétana Buiätat nésaweyo. Wanay Jesusta jiabitesuko, téwekaw bicha sïkak, Liosta batanäpo yéxtek wanay a böbítchak ke utʼtiarata a máknake a nésawnakew bechïbo (Hechos 2:34, 35). Chúkula éntok Lios utʼtiarata a makʼkak a nésaw näte bechïbo. Daniel 7:13, 14te nooka.
3. ¿Wate géntem Jesustámak nésawnake?
Ju Biblia junen jiawa ke Jesustámak wate Liosta tekipanoalérom ämak nésawna. Daniel 7:27po akim am “yew puárim” tiyʼya. Jume bat Liosta yew puakame jume Jesusta apóstolimtukayme. Jehová en énriapo ketune oowim éntok jaamúchim feeta jípureme naw tojʼja aman téwekaw bétana nésawnakew bechïbo. Jesusta bénasi, ime géntem kokʼkoko téwekawim sásaka wanáyim espíritu bénasim jijiäbite. Juan 14:1-3 éntok 1 Corintios 15:42-44te nooka.
¿Jaiki géntem téwekaw bicha sákana? Jesús am “ilikʼki” tiyʼyak (Lucas 12:32). Jume ämak nésaw báreme 144,000tunakemʼme. Apocalipsis 14:1te nooka.
4. ¿Jítasu sïkak Jesusta nésawtayteko?
Jesús 1914po nésawtaytek, wanay Satanasta éntok lemónyom téwekapo yew am bëbiaka Buiaw am kom wootiak. * Ju Diablo tüysi omteka sïme Buiat problémam yätaytek (Revelación [Apocalipsis] 12:7-10, 12). Wanay näteka, jume géntem che june problémamim jíputaytek. Jume naw nasʼsuawame, ju Buia buiteme, jume kökuam, ju tébay wepu profeciata nok chupʼpak wanay iʼi ítom a bitʼtua ke ka jaikika bëye Liosta Yawra yumálasi Buiat nésaw bechïbo. Lucas 21:7, 10, 11, 31te nooka.
5. ¿Jítasu joowa Liosta Yawra en énriapo, éntok jítasu yäna púxbaw bicha?
Ju Liosta Yawra a joowa ke sïmat Buiäpo jume géntem Liosta yäbarew jikʼkaixna, wanay ia paman ju Liosta Yawra juebena géntem sïmat joakame naw tojʼja. Juebena oowim éntok jaamúchim yanti jiápsame ënim Jesusta nokjikʼkaja. Wanay sïme imeʼe émom jínewnake Lios ika ániata ka tüwata lütiayo. Junéntak, si jita türik Yáwrata yäbarew bétana mábet báreteko, Jesustate nokjikʼkaixpo yumala. Apocalipsis 7:9, 14, 16, 17te nooka.
Jume mil wasúktiriam wëyo, Lios a Yawra paman ítom jiápsituana jachin jatwey a waatia bénasi i ániata en jübua a yäko. Ju Buia wepu paraísotunake. Chúkula Jesús Yáwrata a Átchaybew a notʼtiriana (1 Corintios 15:24, 26). ¿Jábetawe a etʼtexwapeyʼya ika Yáwrata bétana? Salmo 37:10, 11, 29te nooka.
^ parr. 6 Che jüne báreteko juka profecía Bíbliapo wëme ítom bitʼtuame jita wënake 1914 wasúktiapo ju libro ¿Qué nos enseña la Biblia?, nota 22, páginas 217 a 220 taxte a bitcha.
