Jehová Buiäta yawʼwak ítom ama jiápsinakew bechïbo. Adán éntok Evata yäko, jume bat géntem, Jehová ka téwekapo am jiapsaiʼay. Lios beja ángelim yälatukay bem ama jiápsanakëwi (Job 38:4, 7). Jehová juka bat ow musälamachi jardín Edenpo órekäpo a yétchak (Génesis 2:15-17). Éntoket, Lios Adántaw júnel jiawa ke äpo éntok a uʼúsim áram jiba bechïbo Buiäpo jiápsanakey. Salmo 115:16 éntok 1 Juan 2:17te nooka.

Ju jardín Edenpo órekame ili rebʼbia Buia jíbatukay. Adán éntok Eva usímim jípunakey Buiäta tápunia bechïbo, wanáyim law lawti musälamachisi a yäsimnakey (Génesis 1:28). Jume géntem jiba bechïbom Buiäpo jiápsana, éntok ju Buia jatwey june ka lütina. Salmo 104:5te nooka.

Buéytuk Adán éntok Eva Liosta ka nokjikʼkajak Edénpom yew bëbiawak. Junéntak, wa paraíso kaytátuk, éntok kabe alʼlebenak juchi yäla. Ju Liosta Noki júnel jiawa ke ju Buia géntem ka tüwata joamew makʼri (Job 9:24). Génesis 3:23, 24te nooka.

Wanaysu, ¿Jehová ketune Buiäta musälamachisi a yäbare? Anaka, buéytuk äpo sïmem bepʼpa utʼtiak éntok sïme a yäbarewta jojuá (Isaías 45:18). Púxbaw bicha, jume géntem jiápsiwame Liosta batnätaka a wátiaw bénasituna. Salmo 37:11, 34te nooka.

Jesús, Liosta Yáwrapo nésaweyo, Buiäta paraísosi a yänake. Ángelimʼmak, sïme jume Liosta saayom Armagedompo am lütiana. Chúkula ju ka tu ángel Satanás tiame Adán éntok Evata jiobʼtuakame, Jesús mil wasúktiapo a patʼtiana. Jume Liosta tekipanoalérom kátim chúpwapo kokʼkonake, buéytuk Jesús am téxwana jita bem yänakewi emo jínew bechïbo éntok am suayana. Wanáyim paraísopo jiba bechïbo jiápsiwamta jípuna. Apocalipsis 20:1-3 éntok 21:3, 4te nooka.

¿Jatweysu a lütiana Lios jita ka tüwata? Jesús a nookak jita imi Buiäpo wënakey ítom at juunenakew bechïbo ke ju lütiwame ka mekʼka äne. Sïme jita ka tüwame wëme a yew bitʼtua ke “i ániaw lütiwaw jëlate jiapsa” o ju ka tüwa chúpwaw jëla. Te si jiba wëtek, sïme géntem ara kokʼkonake. 2 Timoteo 3:1; Lucas 21: 7-14te nooka.

Mil wasúktiapo Jesús téwekaw bétana Buiäta nésaweyo, juka jiökot eamta uwʼwasimna (Isaías 9:6, 7; 11:9). Jesús Yautʼtuna, te ket sumo sacerdotetunake. I júnel jiawbäre ke jume Liosta nákeme jiobʼrim uwʼwana. Júnel Lios, Jesusta usáruaka, kökuam lütiana, kabe oʼólasi ayuna éntok kabe muknake. Isaías 25:8 éntok 33:24te nooka.

Wame Liosta nokjikʼkajame paraísopom joanake (1 Juan 2:17). Jesús a wojäseme gente tu jiápsakame am járiw sawʼwek am maxtiá bechïbo jachin Liosta alʼletuana. En énriapo, Jehová juebena géntem maxtiá Paraísopo jiapsa bechïbo (Sofonías 2:3). Jehovata Testígom Káripo naw yayäjapo aman rukrúkteme jumuʼu wame emo jubʼlame émom maxtiá jachin tülisi emo wériwna, éntok wame uʼúsim jípureme émom mamaxtia jachin che tülisi am yöturiana. Jumu jume átchayriam éntok bem uʼúsiwam náwim Liosta adorarua éntokim emo mamaxtia jachin jume tu nokim tülisi ámew wenʼnake. Miqueas 4:1-4te nooka.