LECCIÓN 6
¿Áram juchi jiápsana jume kokʼkolam?
1. ¿Júchim jiabitena jume kokʼkolam?
Séxtul täpo, Jesús ketune imi Buiäpo aneka, a amigo Lázaro muukuk. Iʼi wepu ili pueblo Jerusaleniw jëla kátekame Betania tiapo joákay. Jesusta aman yepsako, Lázaro beja naiki täwarey mukílataka. Jesús éntok Lázarota waayim, Marta éntok María, mukílata bökaw bícham sajʼjak wanay beja aman aneka láwtipo juebena géntem yaixtáytek. ¿Ake a bícham cheyʼya jachin máyim alʼleyak Marta éntok María Jesús Lázarota jiabitetuako? Juan 11:21-24, 38-44te nooka.
Wepu jita musälamachi Bíbliam maxtiawi kokʼkolam juchi jiabitenákew ajaria. Marta juneyʼyay ke Jehová jume kokʼkolam jiabitetuanakey juchi Buiäpo am jiápsanakew bechïbo. Job 14:14, 15te nooka.
2. ¿Jiápsakam äne wame beja kokʼkolame?
Lios Adántaw júnel jiawa: “Toröchiaʼe wanaye toröchiaw notʼtinake” (GÉNESIS 3:19)
Jume géntem buia toröchiayte yäri (Génesis 2:7; 3:19). Ítom waixwapote ka wepu espírituta jípure sekäna jijiápsamta ítom kokʼkoko. Géntemte, katʼte espíritum takáwat waixwa jiápsame. Óriam mukuko, béjate ka pensasʼsarua. Junen bechïbo jume kokʼkolam káytam iʼinʼnea éntok kátim jiökot eʼeya. Wa bechïbo, Lázaro jiabiteka kayta etʼtexwak jachin aw inʼneakawi mukílataka. Eclesiastés 9:5, 6, 10te nooka.
Watékam a suale ke Lios génteta kokʼkoko infiérnow am bibitʼtua táixpo jiökot am ya báreka, te ju ka lutüria. Béjate jünela ke jume kokʼkolam káytam jüneria. Júnel, ju infierno maxtiria ka lutüria wanay júnel a joowa ke jume géntem Lióstam kulparuana jita ka a yälaw bétana. Äpo juka maxtíriata may a kuxtire. Jeremías 7:31te nooka.
3. ¿Ara kokʼkolamʼmak noktu?
Jume kokʼkolam karam nooka ni kátim jikʼkaja (Salmo 115:17). Te ka tu ángelim géntetamak ara nokame aayu éntokim gente kokʼkolam bénasi ara emo jojuá (2 Pedro 2:4). Junen bechïbo, Jehová ka a türe ke ítapo kokʼkolamʼmak nokʼbänake. Deuteronomio 18:10, 11te nooka.
4. ¿Jábesu juchi jiabitena?
Juebena géntem kokʼkolame júchim Buiäpo jiápsanake; juebena millónim tunakemʼme. Éntoket wate ka Jehovata täyakamta éntok ka tüwata yäkame. Lucas 23:43 éntok Hechos 24:15te nooka.
Wame jiabitekame lutüriata Liosta bétana ara emo maxtianake, Jesustáchim feeta yéchana éntokim Liosta nokjikʼkaixna (Apocalipsis 20:11-13). Júnel a yäko, jiba bechïbo Buiäpom jiápsana. Juan 5:28, 29te nooka.
5. ¿Jítasu Jehovata bétana ítom maxtiá ke jume kokʼkolam jiabitena?
Lios jume kokʼkolam juchi jiabitetuana wanay i ítom maxtiá ke tüysi ítom nakʼke éntok ítomak may türi eläposute pecadórim junʼne. Árate at eyʼya ke Lios a yäna, buéytuk a usíwata äbo bitʼtua a jiápsita ítom bechïbo mikiʼaka. Wanay émposu, ¿jábetase bitpeyʼya kokʼkolam juchi jiabitewako? Juan 3:16 éntok Romanos 6:23te nooka.
