“Koa mandidy anao indray aho hoe: ‘Mahereza sy matanjaha.’ Aza mivadi-po na mihorohoro, fa momba anao i Jehovah Andriamanitrao na aiza na aiza alehanao.”—Josoa 1:9, Fandikan-tenin’ny Tontolo Vaovao.

 “Moa tsy efa nandidy anao ve Aho mba ho sahy sy hahery? Koa aza matahotra na mivadi-po fa Izaho TOMPO Andriamanitrao no homba anao amin’izay rehetra alehanao.”—Josoa 1:9, Dikan-teny Iombonana Eto Madagasikara (DIEM).

 Nanome toky an’i Josoa i Jehovah a Andriamanitra fa ho vitany ny ‘hahery sy hatanjaka’ na dia eo aza ny olana sy ny vato misakana tsy maintsy reseny. Tsy nisy na inona na inona tokony hampahatahotra an’i Josoa, raha nankatò an’i Jehovah izy. Raha mankatò mantsy izy dia ho eo foana i Jehovah hanampy azy. Nomba an’i Josoa Andriamanitra, ka nanoro azy an’izay tokony hataony sy nanampy azy handresy ny fahavalony.

 Inona no hanampy an’i Josoa ‘hahery sy hatanjaka’? Afaka nampahery sy nanatanjaka azy ny Soratra Masina nisy tamin’izany. Tafiditra tamin’izany “ny lalàna rehetra nandidian’i Mosesy [mpanompon’i Jehovah] [an’i Josoa].” b (Josoa 1:7) Niteny tamin’i Josoa i Jehovah mba ‘hamaky sy hisaintsaina andro aman’alina’ azy io. (Josoa 1:8) Nanampy an’i Josoa ho vonona hanao ny sitrapon’Andriamanitra ny namaky sy nisaintsaina ny Soratra Masina. Nila ‘nitandrina tsara izay rehetra voasoratra’ tao i Josoa avy eo, izany hoe nila nampihatra an’izay nianarany tao. Hahomby sy hanao zavatra amim-pahendrena izy raha manao an’izany. Izany mihitsy no nitranga. Na niatrika olana maro aza i Josoa, dia tsy nivadika tamin’i Jehovah mihitsy ary tena sambatra teo amin’ny fiainany.—Josoa 23:14; 24:15.

 Mbola mampahery antsika amin’izao foana ny tenin’i Jehovah tamin’i Josoa. Hita avy amin’ilay izy mantsy hoe tena manampy ny mpanompony rehetra i Jehovah, indrindra rehefa miatrika olana izy ireo. Tiany hahomby hoatran’i Josoa izy ireo. ‘Hahery sy hatanjaka’ hoatran’i Josoa koa izy ireo, raha mamaky sy misaintsaina foana ny Tenin’Andriamanitra, ary mampihatra ny toro lalana ao.

 Nasain’i Jehovah nitarika ny firenen’Israely i Josoa rehefa maty i Mosesy. (Josoa 1:1, 2) Efa niomana hiditra tao amin’ny Tany Nampanantenaina, tany Kanana, ny Israelita tamin’izay. Tsy maintsy niady tamin’ny fahavalo anefa izy ireo. Tsy maintsy niady tamin’ny Kananita, ohatra, i Josoa, nefa ny Kananita tena ratsy fanahy be. c (Deoteronomia 9:5; 20:17, 18) Tsy izay ihany fa betsaka kokoa noho ny Israelita ry zareo, sady nanana fitaovam-piadiana betsaka kokoa. (Josoa 9:1, 2; 17:18) Be herim-po anefa i Josoa ary nanaraka foana ny toromarika avy amin’i Jehovah. Nanampy azy tokoa Andriamanitra, satria tao anatin’ny enin-taona fotsiny dia resin’ny Israelita ny ankamaroan’ny fahavalony.—Josoa 21:43, 44.