“Tsy hisy tsy ho tanteraka mantsy izay lazain’Andriamanitra.”​—Lioka 1:37, Fandikan-tenin’ny Tontolo Vaovao.

 “Fa tsy misy zavatra tsy ho vitan’Andriamanitra!”​—Lioka 1:37, Dikanteny Iombonana Eto Madagasikara.

 Vitan’ilay Andriamanitra Mahery Indrindra ny manao zavatra hoatran’ny hoe tsy hisy mihitsy amin’ny fijerin’olombelona. Tsy misy na inona na inona afaka manakana azy tsy hanatanteraka an’izay zavatra lazainy na ampanantenainy mihitsy.

 Ilay teny tany am-boalohany nadika hoe “lazaina” eto dia mety hilaza “teny” na “fanambarana” nataon’Andriamanitra. Mety hoe ny vokatry ny zavatra nolazain’i Jehovah a Andriamanitra koa no tian’ilay izy holazaina. Tsy maintsy tanteraka foana izay zavatra lazain’Andriamanitra. Azo adika hoatr’izao koa àry ny Lioka 1:37: “Tsy maintsy tanteraka foana mantsy ny fampanantenan’Andriamanitra”, na koa hoe: “Tsy misy zavatra tsy vitan’Andriamanitra.” Hevitra iray ihany no avoakan’ireo dikan-teny rehetra ireo: Tsy misy tsy ho tanteraka izay fampanantenan’Andriamanitra na izay zavatra nolazainy, satria tsy misy zavatra tsy vitany.​—Isaia 55:10, 11.

 Misy teny hafa mitovitovy amin’izany momba ny fampanantenan’Andriamanitra ao amin’ny Baiboly. Nisy fotoana, ohatra, Andriamanitra naniraka anjely mba hiteny tamin’ny Saraha vadin’i Abrahama hoe ho bevohoka izy. Momba anefa i Saraha, sady efa antitra. Hoy Andriamanitra tamin’izay hoe: “Angaha misy zava-mahagaga tsy vitan’i Jehovah?” (Genesisy 18:13, 14) Rehefa avy nisaintsaina momba ny zavaboarin’Andriamanitra koa i Joba, dia niaiky hoe: “Tsy misy tsy vitanao izay rehetra eritreretinao hatao.” (Joba 42:2) Rehefa nanahy koa ny mpianatr’i Jesosy hoe tsy ho vitan-dry zareo ny hahafeno fepetra mba hovonjena, dia nampahatsiahy an-dry zareo i Jesosy hoe “hain’Andriamanitra ny zava-drehetra.”​—Matio 19:25, 26. b

 Tenin’ny anjely iray antsoina hoe Gabriela tamin’ny tovovavy jiosy virjiny iray atao hoe Maria no voarakitra ao amin’ny Lioka 1:37. Vao avy niteny tamin’i Maria i Gabriela tamin’izay hoe hiteraka ny “Zanaky ny Avo Indrindra” izy, dia tokony ‘hataony hoe Jesosy ny anarany.’Ho lasa Mpanjakan’ny Fanjakan’Andriamanitra ilay zazalahy, ary hitondra mandrakizay io fanjakana io.​—Lioka 1:26-33; Apokalypsy 11:15.

 Nanontany i Maria hoe ahoana no hetezan’izany satria izy sady tsy nanambady no “tsy nanao firaisana tamin’ny lehilahy.” (Lioka 1:34, 35) Namaly i Gabriela hoe hampiasa ny fanahiny masina, izany hoe ny hery ampiasainy, Andriamanitra. Mbola fanahy tany an-danitra i Jesosy tamin’izay. Nampiasa ny fanahiny masina àry i Jehovah mba hamindrana ny ain’ilay Zanany ho ao an-kibon’i Maria. (Jaona 1:14; Filipianina 2:5-7) Bevohoka tamin’ny fomba mahagaga i Maria avy eo. Mba hanatanjahana ny finoan’i Maria hoe tena mahery Andriamanitra, dia nilaza taminy ilay anjely hoe efa bevohoka koa i Elizabeta havan-dry zareo, “na dia efa antitra aza.” Momba anefa i Elizabeta, dia tsy mbola nanan-janaka mihitsy izy sy Zakaria vadiny. (Lioka 1:36) I Jaona Mpanao Batisa ilay zazalahy nateraky ry zareo, ary efa nolazain’i Jehovah mialoha koa ny fanompoana hataony.​—Lioka 1:10-16; 3:1-6.

 Nilaza ny teny ao amin’ny Lioka 1:37 ny anjely Gabriela avy eo. Angamba i Maria sy Elizabeta mihitsy no tao an-tsainy tamin’izay. Manome toky ny mpanompon’i Jehovah amin’izao koa ireo teny ireo hoe mbola hanatanteraka ny fampanantenany foana izy. Anisan’izany ilay fampanantenany hoe hesoriny ny fitondram-panjakan’olombelona, dia hosoloany ny fitondran’i Jesosy Kristy Zanany, ilay Mpanjakan’ny Fanjakan’Andriamanitra any an-danitra.​—Daniela 2:44; 7:13, 14.

 Jereo ity video fohy ity raha te hanao topy maso ny bokin’i Lioka.