Eny! Avy amin’Andriamanitra ny Baiboly, ary resahiny ao fa “mampionona an’ireo naetry” izy, izany hoe ny olona kivy na mikorontan-tsaina. (2 Korintianina 7:6) Tsy nosoratana manokana ho an’ny olona hoatr’izany ny Baiboly, nefa misy soso-kevitra tsara be ao. Nanampy olona be dia be mba tsy hamono tena ireny soso-kevitra ireny, ka afaka manampy anao koa.

•  Inona avy ny soso-kevitra omen’ny Baiboly?

•  Misy tantaran’olona te ho faty ve ao amin’ny Baiboly?

•  Inona avy ny andinin-teny hampahery anao?

•  Inona no hataonao raha misy namanao milaza hoe te hamono tena izy?

•  Diso ve aho raha efa nanandrana namono tena taloha?

• ● Lazao izay any am-ponao.

   Inona no lazain’ny Baiboly? “Tia amin’ny fotoana rehetra ny tena namana, sady toy ny rahalahy natao hanampy amin’ny fotoam-pahoriana.”—Ohabolana 17:17.

   Ahoana izany? Mila olona hiresahana isika rehefa mikorontan-tsaina na malahelo be.

   Hoatran’ny hoe mitondra entana mavesatra be ianao rehefa manana olana. Raha zakainao irery eny foana ilay izy, dia hianjera ihany ianao amin’ny farany. Ho maivamaivana anefa ianao raha resahinao izay mahazo anao. Mety hiova hevitra mihitsy aza ianao.

   Andramo izao: Aza mangataka andro fa androany ihany dia miresaha amin’ny olona ao an-trano na amin’ny namana atokisanao. a Azonao soratana koa izay tsapanao.

• ● Manatòna dokotera.

   Inona no lazain’ny Baiboly? “Tsy ny olona salama no mila dokotera, fa ny marary.”—Matio 9:12.

   Ahoana izany? Tokony hanatona dokotera isika rehefa marary.

   Aretina no mahatonga ny olona sasany hamono tena. Misy, ohatra, manana olana ara-tsaina na kivy be foana. Samy tsy mahamenatra ireo satria aretina hoatran’ny aretina rehetra ihany, sady azo tsaboina tsara.

   Andramo izao: Manatòna haingana mpitsabo afaka mikarakara tsara anao.

• ● Tadidio hoe tia anao Andriamanitra.

   Inona no lazain’ny Baiboly? “Tsy vola madinika roa kely vidy ve no ivarotana fody dimy? Tsy misy hadinoina eo anatrehan’Andriamanitra anefa ireny, na iray akory aza. ... Koa aza matahotra, fa sarobidy noho ny fody maro ianareo.”—Lioka 12:6, 7.

   Ahoana izany? Sarobidy amin’Andriamanitra ianao.

   Mety hahatsapa ianao hoe tsy misy miraharaha anao, dia tsy te hiaina intsony ianao. Andriamanitra anefa mahatsapa an’izay tena mahazo anao. Hoy ny Salamo 51:17: “Tsy hataonao tsinontsinona ny fo torotoro sy kivy, Andriamanitra ô!” Tia anao Andriamanitra, dia tsy tiany ho faty ianao.

   Andramo izao: Be dia be ny andinin-teny manaporofo hoe tena tia anao Andriamanitra. Vakio, ohatra, ny boky Manatòna An’i Jehovah, toko 24, fa hahita ny sasany amin’izany ianao ao.

• ● Resaho amin’Andriamanitra izay mahazo anao.

   Inona no lazain’ny Baiboly? “Apetraho [amin’Andriamanitra] daholo izay rehetra mampanahy anareo, satria miahy anareo izy.”—1 Petera 5:7.

   Ahoana izany? Andriamanitra mihitsy no manasa anao hoe resaho aminy daholo ny fihetseham-ponao sy izay mampanahy anao.

   Manampy an’izay miantso vonjy aminy Andriamanitra. (Salamo 55:22) Hanampy anao hilamin-tsaina sy hanana herin-tsaina izy, ka hahavita hiaritra ianao.—Filipianina 4:6, 7, 13.

   Andramo izao: Aza miandriandry fa tonga dia mivavaha amin’Andriamanitra. Antsoy ilay anarany hoe Jehovah, dia resaho aminy izay any am-ponao. (Salamo 83:18) Iangavio izy mba hanampy anao tsy hamoy fo.

• ● Ataovy an-tsaina foana izay ampanantenain’ny Baiboly.

   Inona no lazain’ny Baiboly? “Izany fanantenana ananantsika izany no vatofantsiky ny aintsika, sady azo antoka no mafy orina.”—Hebreo 6:19.

   Ahoana izany? Miovaova be angamba ny fihetseham-ponao izao. Azo oharina amin’ny sambo atsipitsipin’ny onjan-dranomasina ilay izy. Miakatra ambony be tampoka ilay onja, dia avy eo mianjera be indray. Toy ny vatofantsika anefa ny fampanantenan’i Jehovah ka hanampy anao ho tony.

   Tsy nofinofy fotsiny ny fampanantenana ao amin’ny Baiboly, satria Andriamanitra mihitsy no mampanantena hoe hesoriny izay zavatra mampijaly antsika.—Apokalypsy 21:4.

   Andramo izao: Vakio ny lesona 5 ao amin’ny bokikely Vaovao Tsara Natao ho Anao! raha te hahafantatra misimisy kokoa momba ny fampanantenan’Andriamanitra ianao.

• ● Manaova zavatra mahafalifaly anao.

   Inona no lazain’ny Baiboly? “Ny fo falifaly dia sady mahasoa no manasitrana.”—Ohabolana 17:22.

   Ahoana izany? Rehefa manao zavatra mahafalifaly isika dia hilamina kokoa ny saintsika, sady tsy ho kivy be intsony isika.

   Andramo izao: Manaova zavatra tianao. Ohatra hoe mihaino hira mahafalifaly na mamaky zavatra mampahery na manao zavatra hafa mahafinaritra. Ho lasa falifaly koa ianao raha manao zavatra ho an’olona na dia kely fotsiny aza.—Asan’ny Apostoly 20:35.

• ● Manaova zavatra mahasalama.

   Inona no lazain’ny Baiboly? “Mahasoa ... ny fampiasan-tena.”—1 Timoty 4:8.

   Ahoana izany? Ho salama kokoa isika raha manao fanatanjahan-tena, miezaka ho ampy torimaso tsara, dia mihinana sakafo mahasalama.

   Andramo izao: Mandehana an-tongotra mafimafy na dia 15 minitra fotsiny aza.

• ● Tadidio fa mbola hiova ny fiainanao.

   Inona no lazain’ny Baiboly? “Tsy fantatrareo ... izay hitranga aminareo rahampitso.”—Jakoba 4:14.

   Ahoana izany? Mety hoe mafy be mihitsy ny zavatra iainanao, dia mahatsapa ianao hoe tapi-dalan-kaleha. Mandalo ihany anefa izany.

   Marina hoe maizina ny tany aman-danitra androany, fa rahampitso mbola hisava ny rahona. Tsy voatery hampalahelo be hoatr’izao foana ny fiainanao, fa mety hiova. Tsy hahita an’izany anefa ianao, raha mamono tena. Aza milavo lefona àry.—2 Korintianina 4:8.

   Andramo izao: Misy tantaran’olona kivy ao amin’ny Baiboly sady te ho faty mihitsy ry zareo. Vakio ny tantaran’izy ireo dia ho hitanao fa nihatsara ny fiainany, sady tsy nampoiziny ilay izy. Ireto misy ohatra vitsivitsy:

 Eny. Tantarain’ny Baiboly hoe nisy olona vitsivitsy te ho faty. Tsy tezitra tamin’izy ireo anefa Andriamanitra, fa nanampy azy. Matokia àry fa hanampy anao koa Andriamanitra.

Elia

•  ● Iza moa i Elia? Mpaminany be herim-po izy. Nisy fotoana anefa izy kivy. Hoy ny Jakoba 5:17: “Olona nanana fihetseham-po toa antsika ihany i Elia.”

•  ● Fa naninona izy no te ho faty? Nanirery izy sady nieritreritra hoe tsy nisy nilana azy. Natahotra be koa izy. Niangavy an’i Jehovah àry izy hoe: “Esory amin’izay ny aiko, Jehovah ô.”—1 Mpanjaka 19:4.

•  ● Inona no nanampy azy hiova hevitra? Namboraka ny tao am-pony tamin’Andriamanitra i Elia. Dia inona no nataon’Andriamanitra? Nasehony hoe tena tia an’i Elia izy sady tena mahery ka afaka miaro azy. Nanome toky an’i Elia Andriamanitra fa mbola mila azy. Nomeny namana tsara fanahy sy mahay manampy koa izy.

•  ▸ Vakio ato ny tantaran’i Elia: 1 Mpanjaka 19:2-18.

Joba

•  ● Iza moa i Joba? Nanambady aman-janaka izy ary nanan-karena be. Nanompo an’ilay tena Andriamanitra i Joba sady tsy nivadika taminy.

•  ● Fa naninona izy no te ho faty? Niova be tampoka ny fiainany. Fongana, ohatra, ny fananany rehetra. Nisy loza nitranga koa, dia indray maty daholo ny zanany. Tsy vitan’izany fa narary mafy izy, dia nijalijaly be. Avy eo koa izy mbola nendrikendrehin’ny olona hoe ny nataony ihany no nahatonga azy hijaly. Namoy fo izy, dia tafateny hoe: “Maharikoriko ahy izao, tsy tiako ny ho velona.”—Joba 7:16, Fandikan-teny Protestanta.

•  ● Inona no nanampy azy hiova hevitra? Nivavaka tamin’Andriamanitra izy sady noresahiny tamin’olon-kafa izay tsapany. (Joba 10:1-3) Dia nisy namany nangoraka sy nampahery azy, sady nahay nampisaintsaina azy. Eliho no anaran’ilay namany. Nanampy sy nanoro hevitra azy koa Andriamanitra, dia noraisiny tsara ilay izy.

•  ▸ Vakio ato ny tantaran’i Joba: Joba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosesy

•  ● Iza moa i Mosesy? Mpitarika ny firenen’Israely izy ary mpaminany tsy nivadika.

•  ● Fa naninona izy no te ho faty? Be dia be ny andraikitr’i Mosesy, nefa izy koa nisy nanakiana foana. Reraka be izy nony farany. Nitalaho tamin’Andriamanitra izy hoe: “Vonoy mihitsy aho.”—Nomery 11:11, 15.

•  ● Inona no nanampy azy hiova hevitra? Noresahin’i Mosesy tamin’Andriamanitra ny tao am-pony. Nahenan’Andriamanitra ny asany avy eo mba tsy hiferinaina be intsony izy.

•  ▸ Vakio ato ny tantaran’i Mosesy: Nomery 11:4-6, 10-17.