Hoy ny tovovavy iray atao hoe Elaine: “Be mpitia be mihitsy ny mpiara-mianatra amiko, rehefa ao amin’ny tambazotran-tserasera! An-jatony ny mpanaraka ny zavatra avoakan-dry zareo ao. Tsoriko aloha hoe mialona kely aho e!”

 Efa nahatsapa hoatr’izany koa ve ianao? Mety hoe lasa te hiezaka mafy hoatran’ny olon-kafa mihitsy aza ianao mba ho be mpitia ao amin’ny tambazotran-tserasera. Natao hanampiana anao tsy ho tratran’izany ity lahatsoratra ity.

•  Inona avy no mety ho voka-dratsiny?

•  Hoatran’ny hoe be mpitia nefa tsy izay akory

•  Tena zava-dehibe ve ilay hoe be mpanaraka sy mahazo “j’aime” be dia be?

•  Tandremo sao lasa mody manetry tena nefa hay mirehareha

 Milaza ny Baiboly ao amin’ny Ohabolana 22:1 hoe: “Aleo laza tsara toy izay harem-be.” Hita avy amin’io hoe tsy ratsy mihitsy raha hoe mba te ho tsara laza ianao, na hoe te ho tian’ny olona.

 Indraindray anefa ianao te ho tian’ny olona be mihitsy dia lasa tsy manaiky raha tsy malaza be. Mety hisy vokany ratsy anefa izany. Izao no nolazain’i Onya, 16 taona:

 “Mahavita manao zavatra adaladala mihitsy ny olona mba hahatonga azy halaza. Tao am-pianaranay izao nisy nitsambikina avy teny amin’ny varavarankelin’ny rihana faharoa.”

 Misy tanora sasany tokoa maka video an’izay zavatra mampidi-doza ataony, dia alefany ao amin’ny Internet ilay izy avy eo mba hahatonga azy halaza. Nisy ankizy maromaro, ohatra, nanao an’izany. Nihinana savony fanasana lamba mifono anaty plastika ry zareo. Zavatra tsy tokony hatao mihitsy izany fa mety hahafaty, nefa izay mihitsy no nataon-dry zareo, satria ry zareo te halaza.

 Izao no lazain’ny Baiboly: “Aza manao na inona na inona noho ny . . . fireharehana.”—Filipianina 2:3.

 Eritrereto izao:

•   Tena zava-dehibe aminao ve ilay hoe be mpitia ao amin’ny Internet?

•   Tsy mampaninona anao ve na marary aza ianao na maty mihitsy aza satria fotsiny hoe mba tianao hijery anao sy ho tia anao ny olona?

 Tsy voatery hoe manao zavatra mampidi-doza foana anefa ny olona te halaza. Izao, ohatra, no nolazain’i Erica, 22 taona:

 “Misy olona mamoaka sary vaovao foana ao amin’ny tambazotran-tserasera. Miara-maka sary amin’olona samihafa izy, dia hoatran’ny hoe manana namana be dia be mihitsy sady miaraka amin’ny namany foana. Dia lasa hoatran’ny hoe be mpitia be izy.”

 Tantarain’i Cara, 15 taona hoe misy mahavita mandainga mihitsy mba hahatonga ny olona hieritreritra hoe be mpitia izy.

 “Efa nahita olona nanamboamboatra ny sary avoakany aho. Eo amin’ilay sary izy hoatran’ny hoe namonjy fety nefa izy kay tao an-trano ihany.”

 Efa nanao an’izany i Matthew, 22 taona:

 “Namoaka sary tao amin’ny tambazotran-tserasera aho, dia nataoko hoe tany amin’ny Tendrombohitra Everest ilay izy, nefa izaho mbola tsy tany Azia mihitsy!”

 Izao no lazain’ny Baiboly: ‘Te hanao ny marina amin’ny zava-drehetra izahay.’—Hebreo 13:18.

 Eritrereto izao:

•   Raha mampiasa tambazotran-tserasera ianao, efa nandainga ve ianao tao mba hahatonga anao ho be mpitia kokoa?

•    Ny sary sy ny fanamarihana ataonao ao ve mampiseho ny tena maha izy anao sy ny fitsipika arahinao?

 Maro ny olona mieritreritra hoe raha te ho be mpitia izy ao amin’ny tambazotran-tserasera, dia tokony ho be mpanaraka sady tokony hahazo “j’aime” be dia be. Izany mihitsy no noeritreretin’i Matthew, ilay noresahina terỳ aloha. Hoy izy:

 “Indraindray aho manontany olona hoe: ‘Firy ny mpanaraka anao ao amin’ny tambazotran-tserasera?’ Na hoe: ‘Firy ny “j’aime” betsaka indrindra efa azonao?’ Lasa mpanaraka an’izay zavatra avoakan’olona koa aho, hatramin’ny olona tsy fantatro aza, satria nanantena aho hoe mba ho lasa mpanaraka ny an’ahy koa izy, dia mba hihabetsaka ny isan’ny olona mpanaraka an’ahy. Te ho lasa olo-malaza aho, dia vao mainka aho te halaza be rehefa nampiasa tambazotran-tserasera.”

 I Maria indray 25 taona. Hitany hoe tena zava-dehibe amin’ny olona sasany ny isan’ny mpanaraka azy sy ny “j’aime” azony, satria raha vao vitsy kely ireo, dia mieritreritra izy hoe olona tsy misy ilana azy izy. Hoy i Maria:

 “Misy ankizivavy tonga dia mieritreritra hoe ratsy tarehy be raha vao vitsy kely ny isan’ny olona manao ‘j’aime’ ny sariny. Tsy marina izany, fa be dia be anefa ny olona mieritreritra hoatr’izany. Hoatran’ny hoe izy ihany no mampijaly ny tenany.”

 Izao no lazain’ny Baiboly: “Aoka isika tsy hirehareha ka hampisy fifaninanana sy fifampialonana.”—Galatianina 5:26.

 Eritrereto izao:

•   Hitanao ve hoe mampirisika anao hampitaha ny tenanao amin’ny hafa ny tambazotran-tserasera?

•    Ny hoe be mpanaraka ao amin’ny tambazotran-tserasera ve no zava-dehibe kokoa aminao noho ny hoe miezaka hanana namana tena tia anao?