Nivoaka tamin’ny teny chokwe Ny Soratra Grika Kristianina​—Fandikan-tenin’ny Tontolo Vaovao tamin’ny 13 Janoary 2024. Ny Rahalahy Jeffrey Winder, anisan’ny Filan-kevi-pitantanana no nampandre momba izany tamin’ny fandaharana manokana iray natao tany amin’ny sampan’i Luanda, any Angola. Nisy 187 ny nanatrika an’ilay fandaharana mivantana, ary be dia be no nahazo Baiboly vita pirinty. Nisy 353 427 kosa no nanaraka tamin’ny vidéoconférence, ka ny 1 644 tamin’izy ireo dia rahalahy sy anabavy miteny chokwe. Efa azo nalaina tamin’ny endrika elektronika koa io Baiboly io tamin’izay.

Olona telo tapitrisa eo ho eo no miteny chokwe any Angola sy any amin’ny Repoblika Demokratikan’i Congo ary any Zambia. Misy 462 ny mpitory manompo any amin’ireo fiangonana folo miteny chokwe any Angola. Mpitory 734 hafa kosa no manompo any amin’ireo fiangonana 21 miteny chokwe any amin’ny Repoblika Demokratikan’i Congo.

Nandritra an’ilay lahateny namoahana an’ilay Baiboly dia nomarihin’ny Rahalahy Winder fa misy an’ilay anaran’Andriamanitra hoe Jehovah ao amin’ilay Soratra Grika Kristianina​—Fandikan-tenin’ny Tontolo Vaovao, ary miseho ao im-237 izy io. Nilaza ny rahalahy iray hoe: “Tena fanomezana sarobidy io Baiboly io! Resahin’ny Romanina 10:13 hoe ‘izay rehetra miantso ny anaran’i Jehovah no hovonjena.’ Tsy mazava tsara anefa io andinin-teny io ao amin’ny Baiboly sasany amin’ny teny chokwe. Efa tsy andriko izay hampiasana an’ilay Soratra Grika Kristianina mba hanampiana ny olona hahatakatra hoe fa maninona no ilaina ny mampiasa ny anaran’i Jehovah raha te ho voavonjy.”

Matoky isika fa hanampy olona maro ilay Soratra Grika Kristianina​—Fandikan-tenin’ny Tontolo Vaovao amin’ny teny chokwe, mba hahafantatra momba an’i Jehovah sy ho tia azy amin’ny fony manontolo sy ny heriny manontolo.​—Marka 12:33.