Rahalahy sy anabavy maro eran-tany no miezaka mandefa taratasy mampahery ho an’ny olona, amin’izao fiparitahan’ny aretina izao. Nanao hoatr’izany ny Rahalahy Josué Laporta sy Vanesa vadiny. Nandefasan’izy ireo taratasy mampahery ny mpiasan’ny fahasalamana sy ny mararin’ny COVID-19 ao amin’ny hopitaly iray any Barcelone, any Espaina. Nisy mpitsabo mpanampy iray namaly ny taratasin’izy mivady. Neken’io vehivavy io ny hamoahana an’ilay taratasiny, misy fanovana kely, ka indro omenay eto izany. a

Mpitsabo mpanampy aho. . . Manoratra aho mba hisolo tena an’i Bebe [nesorina ilay anarana], 97 taona. Novakinay taminy ilay taratasinareo, tamin’ny maraina. Aterinay mpiasa any amin’ny marary ny taratasy alefan’olona ho azy ireo, nefa azoko antoka fa tsy kisendrasendra ilay hoe izaho no nandray ny taratasinareo. Fara fahakeliny olona roa, izaho sy [ilay marary], no lasa manana fanantenana, vokatr’ilay taratasinareo. Anisan’ireo marary mafy efa ho faty [ilay marary] ary nilaza izy hoe tiany, hono, alohan’ny hahafatesany raha mba valianao, Josué, ilay fanontaniany hoe: “Mety mbola handray soa avy amin’ireo fampanantenan’ny Baiboly ireo ve aho na dia efa 97 taona aza?”

Afaka nijery an’ilay tranonkala noresahinareo aho dia namaky zavatra tao [ho an’ilay marary], nandritra ny folo minitra. Nanohina ny fony ilay izy dia lasa falifaly sy nilamin-tsaina izy. Tsy hoatr’izany mihitsy izy talohan’izay. Nojerenay avy eo ilay video hoe“Inona no Antony Nahafatesan’i Jesosy?”

Novakiko koa ilay gazety [“Mifohaza!”] momba ny adin-tsaina, dia tena manampy ahy hiatrika an’izao zava-tsarotra iainantsika izao ilay izy. Mafy be mantsy izao ny fiainana.

Tsy mba manana psikology azonay iresahana izahay mpiasan’ny fahasalamana ato. Soa ihany fa azonay jerena foana ny fanazavana nomenareo anay na andro na alina, sady azonay saintsainina foana. Rehefa tapitra ity valanaretina ity, dia tiako ho fantatra tsara kokoa izany rehetra izany, ary manantena aho fa ho afaka hampianatra ahy an’izay mbola tsy fantatro ianareo, mba ho azoko antoka hoe mbola hihatsara ny fiainana. Misaotsaotra an’Andriamanitra aho satria tamin’iny andro iny mihitsy, tamin’ny ora fiasako, no tonga ilay taratasinareo, dia nentiko tao amin’ny efitr’i [ilay marary].

Enga anie mba ho salama tsara ianareo mianakavy! Mino aho hoe mahay miatrika kokoa an’izao zavatra iainantsika izao ianareo, raha mihoatra noho ny olon-kafa, satria manana fanantenana. Misaotra betsaka anareo manokana fotoana ho an’ny hafa, anisan’izany izaho sy [ilay marary]. Tsy mba nisy andro nihiratra mihitsy tato anatin’ny iray volana sy tapany, fa noho ny nataonareo dia mba falifaly indray izahay. Isika anefa tsy mifankahalala akory.

Misaotra anareo amin’ny foko manontolo aho!

Rehefa mahazo taratasy fankasitrahana hoatran’io isika, dia vao mainka te hitory foana, mandritra an’izao fiparitahan’ny aretina izao. Mivavaka isika mba hampahery olona ny teny fidintsika amin’ny fanompoana ataontsika.—Ohabolana 15:23.