Nosokafana tamin’ny 25 Jolay 2019 ny tranombakoka momba ny Baiboly ao amin’ny biraon’ny sampan’ny Vavolombelon’i Jehovah any Frantsa. Any Louviers, 100 kilaometatra eo ho eo avy ao Paris no misy azy. “Ny Anaran’Andriamanitra sy ny Baiboly Amin’ny Teny Frantsay” no anaran’ilay tranombakoka.

Hita ao amin’ilay tranombakoka ny Baiboly manan-tantara sy vitsy mpanana amin’ny teny frantsay, anisan’izany ilay nataon’i Olivétan tamin’ny 1535, izay antsoina koa hoe “La Bible de Serrières.” Io no fandikan-teny protestanta voalohany indrindra, nandikana ny Baiboly manontolo ho amin’ny teny frantsay. Io koa no Baiboly frantsay voalohany nadika avy tamin’ny fiteny nanoratana ny Baiboly. Nisy vokany be tamin’ny fandikana Baiboly tatỳ aoriana ilay Baiboly nataon’i Olivétan. Ohatra amin’izany ny Baibolin’i Matthew amin’ny teny anglisy, vita tamin’ny 1537, ny Baibolin’i Genève amin’ny teny anglisy, ary ny Baibolin’i Genève amin’ny teny frantsay. Aseho ao amin’ilay tranombakoka koa ny Baiboly vitsy mpanana, ohatra hoe ilay fanontana fahatelo amin’ny Baiboly frantsay nataon’i Jacques Lefèvre d’Étaples tamin’ny 1541, ny Boky Dimy Voalohany Latinina tamin’ny 1541, ny Baiboly latinina navoakan’i Robert Estienne mpanao pirinty tao Paris tamin’ny 1545, ary ny Baiboly frantsay navoakan’i Jean de Tournes mpanao pirinty tao Lyon tamin’ny 1557.

Samy misy ny anaran’Andriamanitra hoe Jehovah ny Baiboly nataon’i Olivétan, ny Boky Dimy Voalohany Latinina, ny Baiboly latinina navoakan’i Robert Estienne, ary ny Baiboly navoakan’i Jean de Tournes. Nomena ny Sampan-draharahan’ny Tranombakoka any amin’ny Foiben’ny Vavolombelon’i Jehovah, any Warwick, New York, ireo Baiboly ireo tamin’ny voalohany. Naverina tao amin’ny biraon’ny sampan’i Frantsa izy ireo avy eo mba hanampiana an’ireo tahirina Baiboly efa tao.

Hoy i Enrique Ford, avy ao amin’ny Sampan-draharahan’ny Tranombakoka: “Aseho ao amin’ilay tranombakoka vaovao ao amin’ny sampan’i Frantsa hoe mahavariana ny tantaran’ny Baiboly frantsay, ary tena tokony ho hita ao amin’ny Baiboly ilay anaran’Andriamanitra hoe Jehovah. Miezaka mitady Baiboly vitsy mpanana sy mahaliana foana isika mba haseho any amin’ny tranombakoka ampiasaintsika maneran-tany.”