Navoakan’ny Rahalahy Carlos Hortelão, anisan’ny Komitin’ny Sampan’i Angola, Ny Soratra Grika Kristianina​—Fandikan-tenin’ny Tontolo Vaovao sy ny bokin’ny Genesisy, Rota, Estera, ary Jona amin’ny teny ibinda, tamin’ny 2 Aogositra 2024. Nampandrenesina tamin’ny andro voalohany tamin’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Cabinda any Angola izany. Nisy 953 no nanatrika an’ilay fandaharana. Nahazo an’ilay Ny Soratra Grika Kristianina​—Fandikan-tenin’ny Tontolo Vaovao vita pirinty ny mpanatrika. Azo nalaina avy hatrany tao amin’ny jw.org sy ny programa JW Library ny Soratra Grika Kristianina sy ireo boky ao amin’ny Soratra Hebreo ireo.

Misy 716 000 mahery ny olona miteny ibinda mipetraka any Angola. Sambany tamin’io no nisy Baiboly voadika tamin’ny fitenin-dry zareo. Faly be ireo rahalahy sy anabavy 335 any amin’ny fiangonana 13 sy antoko-mpitory iray miteny ibinda any Angola, hoe nahazo Baiboly amin’ny fiteniny.

Navoakan’ny Rahalahy Energy Matanda, anisan’ny Komitin’ny Sampan’i Zimbabwe, tamin’ny 9 Aogositra 2024, Ny Soratra Grika Kristianina​—Fandikan-tenin’ny Tontolo Vaovao amin’ny Tenin’ny Tanana any Zimbabwe. Nandritra an’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Harare any Zimbabwe no nanaovany an’izany. Nisy 405 no nanatrika an’ilay fandaharana. Azo nalaina avy hatrany tao amin’ny jw.org sy tao amin’ny programa JW Library Sign Language ilay Baiboly.

Efa navoaka tamin’ny Tenin’ny Tanana any Zimbabwe ny bokin’i Matio tamin’ny 2021. Navoaka tsikelikely ny boky hafa ao amin’ny Soratra Grika Kristianina, taorian’izay. Tombanana ho iray tapitrisa ny olona mampiasa ny Tenin’ny Tanana any Zimbabwe, anisan’izany ny rahalahy sy anabavy 377 any amin’ny fiangonana 11 sy antoko-mpitory 11 any Zimbabwe.

Nisy fampandrenesana nataon’ny Rahalahy Mark Sanderson, anisan’ny Filan-kevi-pitantanana, tamin’ny lahateny famaranana nataony nandritra an’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Sofia any Boligaria, tamin’ny 11 Aogositra 2024. Nilaza izy hoe havaozina Ny Soratra Masina​—Fandikan-tenin’ny Tontolo Vaovao amin’ny teny boligara, ary navoakany tamin’izay ny bokin’i Matio, Marka ary Lioka. Nisy 5 418 ny mpanatrika. Azo nalaina avy hatrany tao amin’ny jw.org sy ny programa JW Library ireo boky telo ireo.

Tamin’ny 2009 no navoaka voalohany tamin’ny teny boligara Ny Soratra Masina​—Fandikan-tenin’ny Tontolo Vaovao. Efa ho 3 000 izao ny rahalahy sy anabavy manompo any amin’ny fiangonana 57 any Boligaria.

Navoakan’ny Rahalahy Bois Sylvain, anisan’ny Komitin’ny Sampan’i Afrika Andrefana, tamin’ny 16 Aogositra 2024 ny bokin’i Matio sy Marka amin’ny teny aja. Nandritra an’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Djakotomey any Bénin no nanaovany an’izany. Nisy 631 no nanatrika mivantana, tamin’ilay izy nampandrenesina. Nisy 435 koa no nanaraka an’ilay lahateny namoahana an’ireo boky ireo tamin’ny alalan’ny vidéoconférence, tany amin’ny Efitrano Fivoriambe iray any Abomey-Calavi any Bénin. Azo nalaina avy hatrany tao amin’ny jw.org sy ny programa JW Library ireo boky roa ireo.

Maherin’ny 1,2 tapitrisa ny olona miteny aja any Bénin sy Togo. Efa misy fandikan-teny roa hafa amin’ny teny aja ny Soratra Grika Kristianina. Vitsy ihany anefa no afaka manana azy ireny, sady sarotra amin’ny ankabeazan’ny olona ny mahazo ny teny ampiasaina ao. Tsy ahitana an’ilay anaran’Andriamanitra hoe Jehovah koa ao amin’izy ireny. Efa ho 1 300 izao ny rahalahy sy anabavy manompo any amin’ny fiangonana 25 sy antoko-mpitory iray miteny aja any Bénin, ary manompo any amin’ny fiangonana 12 sy antoko-mpitory 2 miteny aja any Togo. Faly be izy ireo nahazo Baiboly mampiasa teny mora azo sady ahitana ny anaran’Andriamanitra eo amin’ny toerana tokony hisy azy.

Navoakan’ny Rahalahy Jeffrey Winder, anisan’ny Filan-kevi-pitantanana, Ny Soratra Masina​—Fandikan-tenin’ny Tontolo Vaovao nohavaozina amin’ny teny kinyarwanda, tamin’ny 16 Aogositra 2024. Nampandrenesin’ny Rahalahy Winder tamin’ny andro voalohany tamin’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Kigali any Rwanda izany. Nisy 9 908 no nanatrika mivantana an’ilay izy. Nisy 1 141 koa no nanaraka an’ilay fandaharana tamin’ny alalan’ny vidéoconférence, tany amin’ny toerana roa hafa nanaovana an’ilay fivoriambe. Nahazo an’ilay Baiboly vita pirinty ny mpanatrika tany amin’ny toerana rehetra nanaovana an’ilay izy. Azo nalaina avy hatrany tao amin’ny jw.org sy ny programa JW Library ilay Fandikan-tenin’ny Tontolo Vaovao nohavaozina amin’ny teny kinyarwanda sy ny raki-peon’ilay izy.

Maherin’ny 13 tapitrisa ny olona miteny kinyarwanda mipetraka any Rwanda. Misy olona miteny kinyarwanda koa any amin’ny firenena hafa, ohatra hoe any amin’ny Repoblika Demokratikan’i Congo, Tanzania ary Ogandà. Tamin’ny 2010 no navoaka voalohany tamin’ny fiteny kinyarwanda Ny Soratra Masina​—Fandikan-tenin’ny Tontolo Vaovao manontolo. Maherin’ny 35 500 izao ny rahalahy sy anabavy manompo any amin’ny fiangonana 634 mampiasa ny fiteny kinyarwanda any Rwanda.

Navoakan’ny Rahalahy David Splane, anisan’ny Filan-kevi-pitantanana, Ny Soratra Masina​—Fandikan-tenin’ny Tontolo Vaovao nohavaozina amin’ny teny Cinghalais, tamin’ny 16 Aogositra 2024. Nampandrenesiny tamin’ny andro voalohany tamin’ilay fivoriamben’ny vondrom-paritra 2024 hoe ‘Torio ny Vaovao Tsara!’ tany Colombo any Sri Lanka izany, ary 4 273 no nanatrika mivantana. Nisy 1 045 koa no nanaraka an’ilay fandaharana tamin’ny alalan’ny vidéoconférence, tany Chilaw any Sri Lanka. Nahazo an’ilay Baiboly vita pirinty amin’ny teny cinghalais ny mpanatrika tany amin’ireo toerana roa ireo. Azo nalaina avy hatrany tao amin’ny jw.org sy ny programa JW Library ilay Fandikan-tenin’ny Tontolo Vaovao nohavaozina amin’ny teny cinghalais.

Efa 75 taona mahery lasa izay ny Vavolombelon’i Jehovah no nanomboka nandika boky ara-baiboly amin’ny teny cinghalais. Maherin’ny 15 tapitrisa izao ny olona miteny cinghalais any Sri Lanka, anisan’izany ireo rahalahy sy anabavintsika 4 808 manompo any amin’ny fiangonana 62 mampiasa ny teny cinghalais.

Navoakan’ny Rahalahy Martin Décousus, anisan’ny Komitin’ny Sampan’i Nouvelle-Calédonie, Ny Soratra Masina​—Fandikan-tenin’ny Tontolo Vaovao manontolo amin’ny teny wallis, tamin’ny 30 Aogositra 2024. Nandritra an’ilay fivoriamben’ny vondrom-paritra 2024 hoe ‘Torio ny Vaovao Tsara!’ no nanaovany an’izany. Natao tany Nouméa any Nouvelle-Calédonie sy tany Mala’e any amin’ny Nosy Wallis sy Futuna ilay fivoriambe. Nampifandraisina tamin’ny alalan’ny vidéoconférence ireo toerana ireo. Nahazo an’ilay Baiboly vita pirinty daholo ny mpanatrika 317. Azo nalaina avy hatrany tao amin’ny jw.org sy ny programa JW Library koa ilay Baiboly.

Tamin’ny 2018 no navoaka tamin’ny teny wallis Ny Soratra Grika Kristianina​—Fandikan-tenin’ny Tontolo Vaovao. Misy rahalahy sy anabavy 153 mampiasa ny fiteny wallis any amin’ny fiangonana roa any Nouvelle-Calédonie sy any amin’ny Nosy Wallis sy Futuna. Efa tsy andrin’izy ireo ny hampiasa ny Fandikan-tenin’ny Tontolo Vaovao manontolo mba hizarana ny vaovao tsara amin’ny olona maherin’ny 35 000 miteny wallis mipetraka any amin’ireo tany ireo.