Tafiditra an-tanety tany Cuba ny Rivo-doza Ian tamin’ny 27 Septambra 2022. Lasa rivo-doza sokajy fahefatra ilay izy ny ampitson’iny, ary niditra tany amin’ny faritra atsimoandrefan’i Floride. Io no anisan’ny rivo-doza nahery vaika indrindra tany Etazonia satria nahatratra 240 kilaometatra isan’ora ny tafio-drivotra nentiny. Nizotra niadana namakivaky an’i Floride ny Rivo-doza Ian mandra-pivoakany tany amin’ny Oseana Atlantika, ka ravarava daholo izay nolalovany. Tanàna kely iray manontolo mihitsy no rava tany amin’ny toerana sasany. Tapaka koa ny jiro tany amin’ny faritra maro, simba be ny lalana sy ny tetezana, ary nisy faritra midadasika be lasa dibo-drano. Niditra an-tanety tany Caroline Atsimo indray avy eo ilay rivo-doza.

Mpitory 12 000 mahery any Floride no tsy maintsy nafindra toerana, vokatr’io rivo-doza nahafatesana olona be dia be io.

Manome an’izay zavatra maika ilain’ireo tra-boina ny anti-panahy. Manampy an-dry zareo ny mpiandraikitra ny faritra, ka miara-miasa amin’ny solontenan’ny Sampan-draharaha Misahana ny Fanorenana eo An-toerana.

Cuba

• Mampalahelo fa rahalahy 1 no maty

• Rahalahy 2 no naratra kely

• Trano 300 no simba kely

• Trano 491 no simba be

• Trano 63 no rava

• Trano 40 fanaovana fivoriana no simba be

• Trano 1 fanaovana fivoriambe no simba kely

• Trano 3 fanaovana fivoriambe no simba be

Floride

• Tsy nisy rahalahy na anabavintsika maty

• Mpitory 2 no naratra kely

• Mpitory 5 874 izao no mbola tsy afaka miverina any an-tranony

• Trano 1 559 no simba kely

• Trano 367 no simba be

• Trano 47 no rava

• Trano 329 hatreto no efa nohamafisina

• Trano 71 hatreto no efa namboarina

• Trano 38 ampiasain’ny fandaminana no simba kely

• Efitrano Fanjakana 1 no simba be

• Efitrano Fivoriambe 1 no simba be

Caroline Atsimo

• Tsy nisy rahalahy na anabavintsika naratra na maty

• Mpitory 35 no tsy maintsy nafindra toerana

• Trano 13 no simba kely

• Mitsidika sy mampahery an’ireo fianakaviana tra-boina ny anti-panahy sy ny mpiandraikitra ny faritra, sady manome an’izay fanampiana ilain’izy ireo

• Nasiana toby vonjimaika 14 any Floride. Natao teny amin’ny lalana andalovan’ireo rahalahy sy anabavy tsy maintsy mifindra toerana izany mba hanampiana azy ireo

• Nisy Komitin’ny Vonjy Rano Vaky natsangana tany Floride sy Cuba mba hiandraikitra ny fanampiana tra-boina

• Manaraka tsara ny toromarika momba ny fiarovana amin’ny COVID-19 ireo mikarakara fanampiana

Tena manampy an’ireo mpiray finoana aminy ireo rahalahintsika rehefa misy loza. Hita avy amin’izany fa marina ny tenin’ilay mpanao salamo hoe: “Manodidina an’izay matoky an’i Jehovah ... ny fitiavany sy ny tsy fivadihany.”​—Salamo 32:10.