Navoaka tamin’ny 25 Aprily 2020 Ny Soratra Masina—Fandikan-tenin’ny Tontolo Vaovao nohavaozina, amin’ny teny kroaty sy serba. Nalaina video mialoha ny Rahalahy Mark Sanderson, anisan’ny Filan-kevi-pitantanana, mba hanao ny lahateny namoahana an’ireo Baiboly ireo. Navoaka amin’ny soratra romanina sy sirilika ilay amin’ny teny serba.

Tsy niara-nivory tao amin’ny toerana iray ny fiangonana any Bosnia-Herzegovina, Kroasia, Monténégro, ary Serbia mba ho fanajana ny fameperana apetraky ny fanjakana, mifandray amin’ny fiparitahan’ny coronavirus. Natao tamin’ny alalan’ny vidéoconférence kosa ilay fivoriana manokana ary 12 705 ny mpanatrika.

Nilaza ny rahalahy iray nanaraka an’ilay fandaharana hoe “vatosoa sarobidy” ilay Baiboly nohavaozina. Hoy ihany izy: “Hoatran’ny hoe miresaka amiko mivantana i Jehovah.” Hoy koa ny anti-panahy iray: “Arakaraka ny hamakiako an’ilay Baiboly nohavaozina amin’ny fiteniko no hahatsapako hoe tia sy mikarakara ahy i Jehovah. Rehefa mampahery olona ao amin’ny fiangonana koa aho, dia afaka mampiseho tsara amin’ny rahalahy sy anabavy hoe tena sarobidy amin’i Jehovah izy ireo.”

Tamin’ny faramparan’ny 1996 isika no nanomboka nandika ny Baiboly ho amin’ny teny kroaty sy serba. Telo taona latsaka kely taorian’izay, tamin’ny Jolay 1999, dia navoaka tamin’ny teny kroaty sy serba Ny Soratra Grika Kristianina—Fandikan-tenin’ny Tontolo Vaovao. Navoaka tamin’ireo fiteny roa ireo avy eo Ny Soratra Masina—Fandikan-tenin’ny Tontolo Vaovao manontolo, fito taona tatỳ aoriana, izany hoe tamin’ny 2006.

Marina tsara sy mora vakina ireo Fandikan-tenin’ny Tontolo Vaovao nohavaozina amin’ny teny kroaty sy serba ireo. Matoky isika hoe hanampy ny mpamaky foana ireo Baiboly ireo mba hahita hoe “velona sy mahery ny tenin’Andriamanitra.”—Hebreo 4:12.