Nivoaka tamin’ny teny okanisi ny bokin’i Matio, Marka, Lioka, ary Jaona, tamin’ny 13 Aogositra 2023. Ny Rahalahy Roy Zeeman, anisan’ny Komitin’ny Sampan’i Suriname no namoaka an’ireo boky vaovao ireo, tamin’ilay fivoriana manokana tao amin’ny Efitrano Fivoriambe tao amin’ny tanànan’i Paramaribo, any Suriname. Nisy 2 713 ny mpanatrika tao amin’io Efitrano Fivoriambe io, ary nisy 691 koa nanaraka an’ilay izy tamin’ny Internet tany amin’ny Efitrano Fanjakana any Cayenne, any Guyane, sy tany amin’ny toeran-kafa maromaro. Efa azo nalaina tamin’ny endrika elektronika ireo boky vaovao ireo. Efa natao pirinty koa ny Ny Baiboly: Ny Vaovao Tsara Nosoratan’i Matio. Mbola hatao pirinty anefa ireo boky telo hafa rehefa hivoaka manontolo amin’ny fiteny okanisi Ny Soratra Grika Kristianina​—Fandikan-tenin’ny Tontolo Vaovao.

Fiteny kreôla ny okanisi, ary ny olona mipetraka any Suriname sy Guyane, firenena eo akaikiny, no tena mpampiasa azy. Rehefa miresaka no tena fampiasa io fiteny io, ka zara raha misy zavatra nosoratana tamin’izy io. Ny Fandikan-tenin’ny Tontolo Vaovao amin’ny fiteny sranan tongo no ampiasain’ny mpitory any amin’ny fiangonana miteny okanisi rehefa mivory sy mitory. Be mpampiasa ny fiteny sranan tongo any Suriname, nefa betsaka amin’ny olona miteny okanisi no tsy mahay tsara an’io fiteny io. Matetika àry ny mpitory no mila miezaka mandika andinin-teny ho amin’ny fiteny okanisi rehefa manompo. Hoy ny mpandika teny iray: “Faly be izahay nahazo an’ireo boky vaovao ireo satria hanampy ny olona miteny okanisi ireo. Handray soa be dia be avy amin’ny Tenin’Andriamanitra izao ireny olona ireny, na firy taona na firy taona, ary na manam-pahaizana na tsia.”

Hoatran’ireo rahalahy sy anabavy miteny okanisi, dia matoky koa isika fa hihabetsaka ny olona tso-po hanome voninahitra an’i Jehovah, noho ireo boky vaovao ireo.​—Salamo 34:1.