9 JANOARY 2024 | VAOVAO FARANY: 3 JOLAY 2024
VAOVAO IRAISAM-PIRENENA

VAOVAO FARANY: VOAHELOKA IREO RAHALAHY | Tapa-kevitra ny Tsy Hiala Amin’i Jehovah

HANDEFA

Nomelohin’ny Fitsaram-paritr’i Krasnogvardeyskiy, any amin’ny Repoblikan’i Crimée, ny Rahalahy Yuriy Gerashchenko sy Sergey Parfenovichhe, tamin’ny 1 Jolay 2024. Samy nomena sazy mihantona enin-taona ry zareo. Tsy voatery higadra aloha izy ireo amin’izao.

Ireo voampanga

Yuriy Gerashchenko

Teraka: 1979 (tany Ukraine)

Mombamomba azy: Elektrisianina no asany

Nahavariana azy ilay hoe marina tsara izay voalazan’ny Baiboly sy hoe mampiseho ny fitiavan’i Jehovah ny olombelona ny fampianarana ao. Natao batisa ka lasa Vavolombelon’i Jehovah tamin’ny taona 2000

Nanambady an’i Irina tamin’ny 2002

Resadresaka nifanaovana taminy

Inona no ianaranao momba an’i Jehovah amin’izao fitsapana mahazo anao izao?

Hitako hoe tena mahay mandinika i Jehovah. Fantany tsara hoe inona no ilaiko ary vonona izy hanampy ahy. Rehefa mandinika an’ireny zavatra nahazo ahy tato ho ato ireny koa aho, dia mahita hoe hay efa nampiomanin’i Jehovah mialoha aho mba hahavita hiatrika an’ilay izy. Hoatran’ny hoe fitaovana eny an-tanany aho. Mikojakoja ny fitaovana ampiasainy ny mpanao asa tanana mahay. Mandranitra sy mikarakara an’ilay fitaovana izy mba ho azony ampiasaina foana amin’ny fotoana ilany azy. Izany foana mihitsy no nataon’i Jehovah tamiko. Izany no mahatonga ahy hatoky azy sy tsy hiala aminy.

Sergey Parfenovich

Teraka: 1972 (tany Mirnoye, any Crimée)

Mombamomba azy: Mpikarakara toerana fanaovana fanatanjahan-tena no asany

Nanohina ny fony ny nahafantatra ny zavatra hataon’ny Fanjakan’Andriamanitra amin’ny hoavy. Natao batisa tamin’ilay fivoriambe iraisam-pirenena natao tany Kiev, any Ukraine, tamin’ny 1993

Nanambady an’i Marina tamin’ny 1997. Manan-janaka lahy efatra sy vavy roa izy ireo

Resadresaka nifanaovana taminy

Tantaran’iza ao amin’ny Baiboly no tena nampahery anao?

Nanoratra ny apostoly Paoly ao amin’ny Filipianina 3:10 hoe: “Ny tanjoko mantsy dia ny hahafantatra azy sy ny herin’ny fitsanganany amin’ny maty, ary ny ho vonona hijaly hoatr’azy koa.” Nosaintsainiko hoe hoatran’ny ahoana ny fitiavan’i Paoly an’i Jesosy. Tena tiany i Jesosy ka vonona mihitsy aza izy hijaly hoatr’azy. Nivavaka koa àry aho mba hitovy toe-tsaina amin’i Paoly sady ho tapa-kevitra hoatr’azy hoe hanahaka an’i Jesosy. Nanampy ahy hanova ny toe-tsaiko izany. Tsy hoe olona mampalahelo be no fahitako ny tenako, fa olona nisafidy ny hanompo foana an’i Jehovah, na inona na inona vokany.

Matoky isika fa hotohanan’i Jehovah foana i Yuriy sy Sergey ary izay rehetra tsy mivadika aminy. Toy ny hoe ‘afeniny eo ambany aloky ny elany’ izy ireo.—Salamo 17:7, 8.

Zava-nitranga

19 Septambra 2022

Nampangaina ho mpanao heloka bevava i Sergey
28 Septambra 2022

Anisan’ny trano valo nosavan’ny polisin’ny FSB ny tranon’i Sergey, ary notanana vonjimaika tany amin’ny trano iray izy
30 Septambra 2022

Notanana am-ponja vonjimaika i Sergey
15 Novambra 2022

Nafahana avy tany am-ponja i Sergey ary nambenana tao an-trano
22 Martsa 2023

Nampangaina ho mpanao heloka bevava i Yuriy. Nosamborina izy, nalaina am-bavany, ary notanana am-ponja vonjimaika
24 Martsa 2023

Nafahana i Yuriy ary nambenana tao an-trano
12 Jolay 2023

Tsy nambenana tao an-trano intsony i Sergey sy Yuriy, fa tsy navela hanao dia lavitra
28 Jolay 2023

Nanomboka ny fitsarana azy ireo. Nampangain’ny mpampanoa lalàna i Sergey sy Yuriy hoe mbola manohy “manao heloka bevava sady mandrahona an’izay vavolombelona nahita an-dry zareo.” Mbola nasain’ny mpitsara nambenana tao an-trano indray izy mirahalahy, na dia tsy ampy aza ny porofo niampangana azy ireo

Jereo Koa

VAOVAO

Gadraina Noho ny Finoany: Crimée

Gadraina noho ny finoany ny Vavolombelon’i Jehovah any Crimée. Diniho ny tantaran’izy ireo ary ataovy pirinty ny lisitr’ireo Vavolombelona izay migadra amin’izao.

VAOVAO