8 DESAMBRA 2022
VAOVAO IRAISAM-PIRENENA

Voaheloka Higadra Enin-taona ny Rahalahy Dubovenko sy Litvinyuk

HANDEFA

Nomelohin’ny Fitsaram-paritr’i Armyanskiy ao amin’ny Repoblikan’i Crimée ny Rahalahy Aleksandr Dubovenko sy Aleksandr Litvinyuk, tamin’ny 30 Novambra 2022. Samy voaheloka higadra enin-taona izy roa lahy ary nampidirina am-ponja teo no ho eo.

Ireo voampanga

Aleksandr Dubovenko

Teraka: 1973 (Ochakiv, Ukraine)

Mombamomba azy: Mpanao sodira, elektrisianina ary mpandrafitra taloha. Nanambady an’i Irina tamin’ny 1999

Lasa Vavolombelon’i Jehovah ny mamany dia nampianatra azy ny fahamarinana. Faly izy rehefa nianatra fa mampanantena ny Baiboly hoe ho lasa paradisa ny tany. Natao batisa tamin’ny 1999

Resadresaka nifanaovana taminy a

Ahoana no niatrehanao an’ilay ianao nambenana tao an-trano?

Tsy navela niresaka tamin’iza na iza tany ivelan’ny tranoko aho nandritra ny herintaona mahery kely. Ny mpanao famotorana sy ny mpisolovava ihany no nahazo niresaka tamiko. Mbola tsy azoko iresahana hatramin’izao ny rahalahy sy anabavy voatonona hoe vavolombelona amin’ilay raharaham-pitsarana momba ahy. Nisaintsaina ny modelin’i Elia anefa aho. Niady saina be izy tamin’izy tany an-tany efitra, dia nanatanjaka azy sy nanome toky azy i Jehovah hoe tsy irery izy. Tsy nandao an’i Elia mihitsy i Jehovah, dia resy lahatra aho hoe tsy handao ahy mihitsy koa izy.

Aleksandr Litvinyuk

Teraka: 1960 (Amangeldi, Kazakhstan)

Mombamomba azy: Niasa tao amin’ny orinasa iray mpanao zezika, ary efa mpanao sodira koa taloha. Nanambady an’i Nadezhda tamin’ny 1979. Manan-janaka lahy iray ry zareo

Lasa saina hoe fa maninona no avelan’Andriamanitra hisy ny fijaliana sy ny faharatsiana. Nahita ny valiny rehefa nanomboka nianatra Baiboly tamin’ny Vavolombelon’i Jehovah izy sy Nadezhda. Natao batisa tamin’ny 1993

Resadresaka nifanaovana taminy b

Ahoana no niomananao hiatrika fanenjehana?

Rehefa naheno ny nanjo ny rahalahy sy anabavy aho dia lasa saina hoe izaho ve efa vonona hiatrika fanenjehana. Nandinika teo aho dia tonga saina hoe mbola tsy tena vonona. Nanomboka namaky tantaran’olona niatrika fitsapana mafy be ao amin’ny Baiboly aho, dia nisaintsaina an’ireny. Nodinihiko tsara hoe inona no nanampy an-dry zareo hahavita hiaritra sy hatoky an’i Jehovah. Nanaovako fikarohana ireny tantara ireny, dia amin’izay hoatran’ny hoe teo mihitsy aho dia niaina ny zava-drehetra. Nijery tantaram-piainan’ny rahalahy sy anabavy tsy nivadika koa izahay mivady. Tena nanatanjaka ny finoanay ireny rehetra ireny sady nanampy anay ho vonona kokoa hiatrika an’ilay zavatra efa niandry anay.

Nanampy anao ve ny vavaka nataon’ny olon-kafa ho anao?

Tena latsa-dranomaso aho rehefa naheno hoe mivavaka ho ahy ny rahalahy sy anabavy. Mangataka amin’i Jehovah ry zareo mba hanampy ahy ho tony sy ho be herim-po, sady hanome ahy ny hery ilaiko. Isaky ny hiakatra fitsarana aho dia misy rahalahy manontany foana hoe inona no zavatra mampanahy ahy noresahiko tamin’i Jehovah momba an’ilay fitsarana. Dia avy eo izy mivavaka momba an’iny mihitsy rehefa miandry ao ivelany. Tena nampahery be ahy izany.

Mampahery antsika ny mahalala hoe eo akaikintsika eo foana i Jehovah na aiza isika na aiza, ary na inona na inona fitsapana atrehintsika.—Salamo 139:7-12.

Zava-nitranga

2 Aogositra 2021

Samy nampangaina ho mpanao heloka bevava izy roa lahy, satria hoe nampiasa programa fanaovana vidéoconférence mba hanaovana asa mampidi-doza
5 Aogositra 2021

Nosavana ny tranon’ny fianakaviana Vavolombelon’i Jehovah valo, anisan’izany ny tranon-dry Dubovenko sy Litvinyuk. Nosamborina ny Rahalahy Litvinyuk ary notanana am-ponja vonjimaika
6 Aogositra 2021

Nafahana ny Rahalahy Litvinyuk ary nambenana tao an-tranony
9 Aogositra 2021

Nosavana fanindroany ny tranon-dry Dubovenko. Natao famotorana i Aleksandr ary nambenana tao an-tranony
11 Aogositra 2021

Nampangaina hoe nandamina ny asan’ny fikambanana iray mampidi-doza ny Rahalahy Litvinyuk
8 Febroary 2022

Nampangaina hoe nandamina ny asan’ny fikambanana iray mampidi-doza ny Rahalahy Dubovenko
29 Aprily 2022

Nanomboka ny fitsarana. Nolavin’ny mpitsara ny fangatahan’ny Rahalahy Litvinyuk ho any amin’ny dokotera sy hahazo fitsaboana tamin’izy nambenana tao an-tranony
8 Septambra 2022

Navela hivoaka ny trano izy roa lahy isan’andro manomboka amin’ny fito maraina ka hatramin’ny fito hariva
30 Novambra 2022

Voaheloka higadra enin-taona izy roa lahy

a b Talohan’ny didim-pitsarana no natao ny resadresaka tamin-dry zareo.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO