Hoy ny Rahalahy Geoffrey Jackson, anisan’ny Filan-kevi-pitantanana, tamin’izy hamoaka Ny Soratra Hebreo—Fandikan-tenin’ny Tontolo Vaovao amin’ny teny hebreo maoderina: “Nanomana fanomezana manokana ho anareo ny Filan-kevi-pitantanana.” Tao amin’ny Romema Arena, any Haïfa, Israely, no natao io fandaharana manokana io, tamin’ny 11 Janoary 2020, ary nisy 2 125 ny mpanatrika.

Hoy ny Rahalahy David Simozrag, ao amin’ny Biraon’ny Filazam-baovao any Israely: “Tombanana ho valo tapitrisa mahery ny olona miteny hebreo atỳ aminay. Mino izahay hoe tena hahasoa an’ireo olona ireo ny Tanakh a amin’ny teny hebreo maoderina.” Vitsy ihany ny dikan-tenin’ny Tanakh amin’ny fiteny maoderina ary anisan’izany io Soratra Hebreo vao navoaka io.

Efa misy amin’ny fiteny 186 izao ny Fandikan-tenin’ny Tontolo Vaovao manontolo na ny ampahany aminy. Niezaka mafy nampita ny hevitry ny Baiboly amin’ny fomba marina tsara ny ekipa mpandika teny hebreo, toy ny nataon’ny Masoreta taloha. Telo taona mahery no nandikan’izy ireo an’io Soratra Hebreo maoderina io. Hoy ny iray amin’izy ireo: “Betsaka ny Hebreo tsy mahazo tsara ny hevitry ny andininy sasany, na ny boky sasany ao amin’ny Baiboly mihitsy aza, raha tsy mijery fanazavana na fandikan-teny amin’ny fiteny hafa. Mora azon’ny mpamaky izao ny hevitry ny Soratra Masina satria efa misy an’ity Baiboly vaovao ity.”

Hoy ny rahalahy iray: “Tsy mazava amin’ny mpamaky tsotsotra mihitsy hatramin’izay ny ampahany be amin’ny Tanakh. Marina kokoa anefa izao ny fahazoany azy sady mazava aminy ilay izy.” Misy mpitory 2 000 mahery ao amin’ny faritra iandraiketan’ny sampan’i Israely, ary ny 603 amin’ireo no ao Israely. Azo antoka hoe hampiasa an’io fanomezana manokana io izy ireo “mba handinika sy hitandrina ny lalàn’i Jehovah.”—Ezra 7:10.