3 MEY 2017
KAZAKHSTAN

Voaheloka Higadra i Teymur Akhmedov Noho Izy Nanaraka ny Fivavahany

HANDEFA

Nomelohin’ny fitsarana any Astana, Kazakhstan, higadra dimy taona i Teymur Akhmedov, tamin’ny 2 Mey 2017, satria fotsiny hoe niresaka ny zavatra inoany tamin’olona. Izy no Vavolombelon’i Jehovah voalohany nogadraina noho ny fivavahany, taorian’ny nahazoan’i Kazakhstan fahaleovan-tena, tamin’ny 1991.

Efa nisy olona be dia be avy any amin’ny tany maromaro niangavy hoe aleo A^toa Akhmedov mba hambenana any an-tranony, mandra-pahatongan’ny fitsarana azy. Tsy nety anefa ny fitsarana fa mbola nampidiriny am-ponja vonjimaika ihany izy, ary efa telo volana mahery izy izao no any. Efa 61 taona izy sady amin’izay tsy salama. Manambady koa izy, ary manan-janaka telo lahy.

Voasazy satria nivavaka

Tamin’ny Janoary 2017 no nanomboka ilay olana. Nosamborin’ny Komity Miandraikitra ny Filaminam-bahoaka (KNB) na ny polisy miafina any Kazakhstan A^toa Akhmedov tamin’izay, satria nampangaina hoe nandika ny Andininy 174(2) amin’ny Lalàna Momba ny Heloka Bevava. Nolazaina fa ‘nampirisika olona . . . hankahala fivavahana’ izy, satria hoe niresaka mitokana ny zavatra inoany tamin’izy ireo.

Nilaza ny Mpitsara Talgat Syrlybayev fa “mampiady fivavahana” A^toa Akhmedov satria, hono, niteny tamin’ny olona hoe “ny fivavahany irery no marina, ka ambony noho ny olon-kafa izy.” Namoaka didy koa ilay mpitsara hoe tsy mahazo manao an’izay “zavatra fanaon’ny fivavahany” intsony A^toa Akhmedov mandritra ny telo taona. Raha tsorina dia hoe tsy azony atao intsony izany ny manaraka an’ilay fivavahany.

Hoy i Philip Brumley, Mpanolo-tsaina Momba ny Lalàna, izay misolo tena ny Vavolombelon’i Jehovah: “Tena tsy araka ny tokony ho izy mihitsy ny fampiharan’ny manam-pahefana ny lalàna. Nisy lehilahy maromaro nanasa an’i Teymur ho any amina trano iray, ohatra, tamin’ny 2016, mba hiresaka amin’izy ireo ny zavatra inoany. Nisy fotoana aza ry zareo tonga tany aminy mihitsy. Hay noraisin-dry zareo feo ilay resaka, dia iny avy eo no nentiny niampangana azy. Aiza ve koa vitan’ny manam-pahefana hatramin’izany mihitsy! Izay hanafoanana sy hanamelohana an’ilay fivavahana mihitsy no tanjony, nefa tsy hoe nanao ratsy akory ilay fivavahana. Tsy rariny mihitsy izany!”

Nandidy an’i Kazakhstan ny Komitin’ny Firenena Mikambana Miaro ny Zon’olombelona mba hanitsy ny Lalàm-panorenany, amin’izay ho voaro ny zon’ny olona hanaraka an’izay fivavahana tiany. “Lasa mampanahy” an’io komity io koa ny ataon’ny fitondrana any Kazakhstan. “Tsy mazava mihitsy” mantsy “ny famaritany ny atao hoe heloka bevava sy ny dikan’ny hoe mandika ny Lalàna Momba ny Heloka Bevava, anisan’izany ilay andininy faha-174 sy 404. Hoatr’izany koa ilay Fehezan-dalàna Fitantanana sy ny lalàna natao hiadiana amin’ny asa fampihorohoroana. Ireo lalàna ireo anefa no entiny hanasaziana mafy an’izay olona mba te hanaraka ny fivavahana tiany sy hino an’izay tiany hinoana. ... Tokony havelan’ny Fanjakana hanaraka an’izay fivavahana tiany sy hino an’izay tiany hinoana ny olona.”—Komitin’ny Firenena Mikambana Miaro ny Zon’olombelona, Concluding Observations on the Second Periodic Report of Kazakhstan, UN Doc. CCPR/C/KAZ/CO/2 (9 Aogositra 2016).

Matahotra be koa ny fianakavian’A^toa Akhmedov noho ilay aretina mahazo azy. Misy fivontosana mantsy ao amin’ny vatany sady mandeha ra ilay izy (ary efa atahorana sao kansera). Tsy neken’ny manam-pahefana anefa ilay fangatahana hoe hambenana any an-tranony A^toa Akhmedov. Tsy mba nokarakarain-dry zareo koa izy, nefa efa hita hoe tena atahorana ny ainy. Nanapa-kevitra àry ny mpisolovavany hoe handefa fitarainana any amin’ireto: Ny Fikambanana eo Anivon’ny Firenena Mikambana Manadihady Momba ny Fanagadrana Olona Tsy Ara-drariny, ny Mpitondra Tenin’ny Firenena Mikambana manadihady ny zon’ny olona hanaraka izay fivavahana na finoana tiany, ary ny Mpitondra Tenin’ny Firenena Mikambana manadihady ny zon’ny olona hanao fivoriana sy hiaraka maromaro.

Tsy halalaka intsony ve izany ny fivavahana any Kazakhstan?

Be dia be mihitsy ny zavatra iaretan’ny Vavolombelon’i Jehovah any Kazakhstan noho izy ireo manaraka ny fivavahany. Mbola tsy nisy hoatran’ity nanjo an’A^toa Akhmedov ity anefa! Tsy rariny ilay izy sady tena tafahoatra. Mbola mandefa fangatahana any amin’ny mpitondra fanjakana any Kazakhstan foana ny solontenan’ny Vavolombelon’i Jehovah hatramin’izao. Iangavian’izy ireo i Kazakhstan mba hanaja ny fifanarahana nataony tamin’ny firenen-kafa, hoe mahazo manaraka an’izay fivavahana tiany ny olona.

Porofo fa Manana Zo Hanaraka An’izay Fivavahana Tiany sy Hilaza ny Heviny A^toa Akhmedov

Nisy manam-pahaizana malaza maromaro nanaporofo hoe manana zo hiresaka momba ny fivavahany A^toa Akhmedov. Nentina teny amin’ny fitsarana ny zavatra nolazain’izy ireo, ny herinandro faharoa nitsarana an’A^toa Akhmedov.

“Niresaka tsotra momba ny fivavahany fotsiny A^toa Akhmedov, fa tsy hoe nila ady. . . . Na ilay boky aza miresaka fampianarana avy ao amin’ny Baiboly fotsiny, . . . fa tsy hoe mampirisika ny olona hanao asa fampihorohoroana, . . . na hankahala ny mpiara-monina aminy na ny foko hafa na ny fivavahana hafa.”—Eileen Barker, Profesora momba ny toe-karena sy siansa politika ao amin’ny Oniversiten’i Londres.
“Na dia mety hoe niteny aza ny Vavolombelon’i Jehovah hoe ny fivavahany no marina fa ny an’ny hafa diso, dia tsy ry zareo irery ange no miteny hoatr’izany e! Manao an’izany daholo koa ny fivavahana hafa rehetra. Tsy midika mihitsy izany hoe te hampirisika ny olona hanao asa fampihorohoroana na hahery setra ry zareo.”—Dr. Massimo Introvigne, Oniversiten’i Turin, Italia.
‘Ao amin’ny Baiboly misy andinin-teny maromaro manazava ny zavatra azon’ny olona atao sy tsy azony atao. Dia izay fahazoan’A^toa Akhmedov an’izany fotsiny no nolazainy. Hoatran’izany koa ny ao anaty bokin’ny Vavolombelon’i Jehovah.’—James T. Richardson, J.D., Profesora Momba ny Sosiolojia sy ny Lalàna, Oniversiten’i Nevada, any Reno.

Vao mainka voaporofo avy amin’ny tenin’ireo manam-pahaizana ireo fa tsy meloka ho “nampiady fivavahana” A^toa Akhmedov, na meloka satria hoe ‘nilaza fa ny fivavahany ihany no marina.’ Tsy nandika lalàna mihitsy izy rehefa nilaza ny heviny momba ny fivavahany sy ny zavatra inoany.

VAOVAO