Navoakan’ny Rahalahy Mark Hutchinson, anisan’ny Komitin’ny Sampana any Malawi, tamin’ny 8 Aogositra 2021 Ny Baiboly: Ny Filazantsaran’i Matio amin’ny Tenin’ny Tanana Malawi. Io no boky voalohany ao amin’ny Baiboly voadika tamin’ny Tenin’ny Tanana Malawi.

Efa noraisina video mialoha ilay fandaharana namoahana an’ilay bokin’i Matio, dia nalefa hojeren’ny mpiara-manompo eran’ilay tany. Nalefa tamin’ny tele sy radio iray tany an-toerana koa ilay fandaharana.

Tamin’ny 2005 no nisy fiangonana tamin’ny tenin’ny tanana voalohany, tany Lilongwe. Tamin’ny 2009 indray no nanomboka nadika tamin’ny Tenin’ny Tanana Malawi ny boky sy gazety. Boky sy gazety 34 no voadika tamin’ny Tenin’ny Tanana Malawi nanomboka tamin’izay. Misy ekipa dimy any amin’izao, dia mpandika teny 21.

Hoy ny marenina iray, anisan’ny mpandika teny, momba an’ilay tetikasa: “Efa faly izahay hoe voadika tamin’ny tenin’ny tanana ny andinin-teny tao anatin’ireny boky sy gazety ireny. Vao mainka faly anefa izahay izao satria lasa voadika hatramin’ny andinin-teny manodidina an’izay vakinay, dia mba azonay ampiasaina amin’ny fianarana samirery sy eny amin’ny saha ireny.”

Tena mazava be ilay fandikan-teny. Ohatra amin’izany ny Matio 22:44. Hoy ny mpandika teny iray: “Izao no nandikana an’io andinin-teny io any amin’ny Baiboly hafa: ‘Hoy ny Tompo tamin’ny Tompoko.’ Lasa hoatran’ny hoe iray ihany i Jehovah sy Jesosy eo amin’ilay izy. Amin’ity fandikan-teny ity anefa mazava kokoa satria hita hoe i Jehovah no miresaka amin’i Jesosy Tompo.”

Enga anie io fanomezana nomena ny rahalahy sy anabavintsika any Malawi io ka hanatanjaka ny fifandraisan’izy ireo amin’ilay mpanome ny “fanomezana tonga lafatra rehetra”, dia i Jehovah.​—Jakoba 1:17.