Nivoaka tamin’ny 5 Jona 2022 Ny Soratra Grika Kristianina​—Fandikan-tenin’ny Tontolo Vaovao amin’ny teny iban. Betsaka ny mpiara-manompo niara-nivory tany amin’ny Efitrano Fanjakana, mba hijery an’ilay fandaharana noraisina video mialoha. Ny mpitory sasany indray nijery an’ilay fandaharana tamin’ny vidéoconférence. Amin’ny Jolay na Aogositra 2022 kosa no hivoaka ilay Baiboly vita printy.

Rehefa nandika an’ilay Baiboly ny ekipa mpandika teny nanao an’ilay izy, dia tsy maintsy nandinika tsara ry zareo satria samy hafa arakaraka ny faritra ny dikan’ny teny iban sasany. Olona maromaro avy any amin’ny faritra samihafa no nasaina namaky an’ilay fandikan-teny, dia izany no nanampy ny mpandika teny hifidy voambolana azon’ny ankamaroan’ny mponina miteny iban.

Hanampy ny mpitory eny amin’ny fanompoana koa ity Baiboly vaovao ity, mba hanazavan-dry zareo amin’ny fomba marina tsara ny fahamarinana. Sarotra be tamin’ny mpitory, ohatra, taloha ny nanazava an’ilay tapany farany lazain’ny Jaona 4:24 hoe: “Izay mivavaka aminy [Andriamanitra] tsy maintsy mivavaka araka ny fanahy sy ny fahamarinana.” Diso mantsy ny fomba nandikana an’ilay teny hoe “fanahy” ao amin’ny Baiboly iban teo aloha, satria “fanahin’ny maty” no nandikana an’ilay izy tao amin’ireny Baiboly ireny. Lasa sarotra tamin’ny olona liana àry ny nahafantatra hoe ahoana marina izany ny fomba tokony hivavahan-dry zareo amin’Andriamanitra.

Tsara be mihitsy ilay Baiboly vaovao ka niteny ny iray tamin’ilay mpandika teny hoe: “Ity Soratra Grika Kristianina​—Fandikan-tenin’ny Tontolo Vaovao amin’ny fiteninay ity no porofo mazava tsara hoe tia be ny olona rehetra i Jehovah.”

Mivavaka isika mba tena hanampy olona betsaka kokoa miteny iban ity Baiboly vaovao ity mba hahazoan’izy ireo tsara an’izay lazain’ny Baiboly, dia mba hanampy azy ireo hifandray akaiky amin’i Jehovah Andriamanitra sy hanome voninahitra ny anarany.​—Salamo 117:1.