Navoaka amin’ny fiteny roa ampiasaina any Nizeria ny Soratra Grika Kristianina​—Fandikan-tenin’ny Tontolo Vaovao. Tao anatin’ny faran’ny herinandro roa nifanesy no namoahan’ny rahalahy anisan’ny Komitin’ny Sampana any an-toerana an’ireo Baiboly ireo. Samy nandritra an’ilay Fivoriamben’ny Vondrom-paritra 2023 hoe “Manàna Faharetana”! no navoaka ireo Baiboly ireo, ny iray tany amin’ny tanànan’i Bénin, dia ny iray tany Agbor, any Nizeria. Tamin’ny 8 Desambra 2023 no navoakan’ny Rahalahy Archibong Ebiti ny Soratra Grika Kristianina amin’ny teny édo. Ilay amin’ny teny esan indray navoakan’ny Rahalahy Malcolm Hall tamin’ny 15 Desambra 2023. Tonga dia nizarana an’ilay Baiboly vita pirinty ny mpanatrika, tamin’ireo fandaharana roa ireo. Tonga dia azo natao koa ny naka an’ireo Baiboly ireo amin’ny endrika elektronika na naka ny raki-peon’ilay izy tao amin’ny Internet.

Olona 1 678 no nanatrika an’ilay fandaharana namoahana ny Soratra Grika Kristianina amin’ny teny édo. Olona roa tapitrisa eo ho eo no miteny édo maneran-tany. Misy fiangonana 23 miteny édo any Nizeria, dia rahalahy sy anabavy 900 mahery no manompo ao amin’ireo fiangonana ireo. Tamin’ny 2014 no nanomboka nisy ekipa miasa manontolo andro mandika teny amin’io fiteny io. Tamin’io taona io koa no nanomboka nisy boky sy gazety amin’ny teny édo tao amin’ny tranonkalantsika.

Marina hoe efa be dia be ny Baiboly misy amin’ny teny édo. Sarotra anefa ny mahita an’ireny dikan-teny ireny sady lafo be ny vidiny. Betsaka amin’ireny dikan-teny ireny koa no tsy mampiasa ny anaran’i Jehovah. Tsy vitan’izay fa teny efa taloha be no ampiasaina ao anatiny, dia lasa sarotra amin’ny olona miteny édo ny mahazo ny zavatra resahin’ny Baiboly. Hoy ny Ranabavy Patience Izevbuwa, 74 taona ary efa 50 taona mahery nanompoana an’i Jehovah: “Tena faly be tsy misy hoatr’izany aho nahazo ny Soratra Grika Kristianina​—Fandikan-tenin’ny Tontolo Vaovao amin’ny teny édo. Tsy haiko intsony izay hilazana ny hafaliako!”

Olona 692 mahery no nanatrika an’ilay fandaharana namoahana ny Soratra Grika Kristianina amin’ny teny esan. Olona iray tapitrisa mahery no miteny esan any Nizeria. Misy fiangonana folo miteny esan any amin’izao, dia rahalahy sy anabavy 640 no ao amin’ireo fiangonana ireo.

Io no dikan-tenin’ny Soratra Grika Kristianina voadika feno voalohany amin’ny teny esan. Ny Soratra Grika Kristianina​—Fandikan-tenin’ny Tontolo Vaovao amin’ny teny anglisy no novakin’ny rahalahy sy anabavy maro miteny esan, talohan’ny namoahana an’ilay dikan-teny vaovao. Niresaka momba an’ilay hoe ‘izany harena izany ao anaty vilany tany’ ao amin’ny 2 Korintianina 4:7 ny anabavy iray. Hoy izy: “Tadidiko fa rehefa mamaky an’io andinin-teny io amin’ny teny anglisy aho taloha dia tsy azoko mihitsy ny tiany hotenenina. Adika hoatr’izao anefa ilay izy ao amin’ny Fandikan-tenin’ny Tontolo Vaovao: ‘Na dia hoatran’ny vilany tanimanga aza isika, dia nomen’Andriamanitra an’izany fanompoana sarobidy izany.’ Lasa mazava kokoa amiko izao ny hevitra tian’ilay izy hampitaina, dia lasa manohina ny foko kokoa. Tena fanomezana tsara be io dikan-teny io!”

Miara-paly amin’ny rahalahy sy anabavintsika miteny édo sy esan isika, amin’izao ry zareo nahazo Ny Soratra Grika Kristianina​—Fandikan-tenin’ny Tontolo Vaovao amin’ny fitenin-dry zareo izao. Mivavaka koa isika mba hanampy olona be dia be kokoa ‘hahalala tsara ny fahamarinana’ ireo Baiboly ireo.​—1 Timoty 2:3, 4.