Navoakan’ny Rahalahy Kenneth Cook, anisan’ny Filan-kevi-pitantanana, Ny Soratra Masina​—Fandikan-tenin’ny Tontolo Vaovao nohavaozina tamin’ny teny ibo. Nandritra ny fandaharana iray noraisina video mialoha no namoahana an’ilay Baiboly, tamin’ny 4 Aprily 2021. Fiangonana 1 140 no mampiasa an’io fiteny io any Nizeria, ary faly be ry zareo nahazo an’ilay Baiboly nohavaozina. Efa 14 taona mantsy izay no nivoaka ilay Fandikan-tenin’ny Tontolo Vaovao voalohany tamin’ny teny ibo.

Tena handray soa amin’io fandikan-teny io ireo mpitory 50 000 manompo any amin’ny faritany miteny ibo. Fitaovana tena tsara azon’izy ireo ampiasaina amin’ny fitoriana koa io Baiboly io. Miisa 40 tapitrisa eo ho eo ny isan’ny mponina mampiasa an’io fiteny io.

Nilaza ny iray tamin’ny mpandika teny ibo hoe: “Tena hanintona ny mpamaky ibo io Fandikan-tenin’ny Tontolo Vaovao nohavaozina natao tamin’ny fiteny maoderina io, satria be dia be ny fanamarihana ambany pejy ao anatin’ilay izy. Tsy fanazavana ny teny na fomba fiteny hebreo sy grika fotsiny ilay fanamarihana ambany pejy, fa indraindray teny samihafa azo andikana an’ilay teny amin’ny fiteny ibo. Misy fitenim-paritra isan-karazany koa ny fiteny ibo, dia indraindray soratana eo amin’ny fanamarihana ambany pejy ny fomba fiteny manampy ny mpamaky ibo rehetra mba hahazo ny zavatra vakiny.

Nilaza ny Rahalahy Archibong Ebiti, anisan’ny Komitin’ny Sampan’i Nizeria hoe: “Mpandika teny enina no namita an’ilay Baiboly nohavaozina tao anatin’ny efa-taona. Nisy olana tsy nampoizina sy fahatarany ilay Baiboly noho ny valanaretina, kanefa tena misaotra an’i Jehovah isika satria malala-tanana be izy, dia nomeny fanahy masina ny olona nandray anjara tamin’ilay tetikasa.”

Matoky isika fa ho tian’ny olona miteny ibo maneran-tany ny hamaky ny teny mahafinaritra ao amin’io Baiboly nohavaozina io. Ho tsapan-dry zareo koa hoe tena mora ny mampianatra sy manazava “ny lalan’Andriamanitra” amin’izy io.​—Asan’ny Apostoly 18:26.