Manantena ny Vavolombelon’i Jehovah any Ouzbékistan fa hamela azy ireo hanaraka ny fivavahany an-kalalahana ny manam-pahefana any. Nisy fivoriana maromaro nataon’izy ireo niaraka tamin’ny manam-pahefana any, tamin’ny 2013. Anisan’ny nanatrika azy ireny i Igor Yurchenko. Hoy izy: “Voamarikay hoe efa nisy fivoarana be ny resaka nifanaovanay tamin’ireo manam-pahefana eto Ouzbékistan, ary hoatran’ny vonona ny hiova ry zareo. Manantena izahay fa hisy vokany tsara tsy ho ela ireny fivoriana ireny.”

Anisan’ny zavatra mahavelom-panantenana nataon’ny manam-pahefana ouzbek, ny nanafahan’izy ireo an’i Abdubannob Akhmedov, tamin’ny 2 Martsa 2013. Tokony higadra enin-taona sy tapany izy noho ny asa ara-pivavahana nataony, kanefa nafahana rehefa avy nigadra efa-taona sy tapany mahery. Nisy Vavolombelona roa hafa koa nogadraina niaraka taminy. Efa nafahana izy ireo tamin’ny 2012. Tsy misy Vavolombelona migadra intsony izao any Ouzbékistan.

Tapa-kevitra ny hiova famindra eo amin’ny fanajana ny zon’olombelona i Ouzbékistan, taorian’ny nanafahana an’A^toa Akhmedov. Vonona ny fitondrana any hampihatra an’ireo soso-kevitra natao mba hanekena hoe manan-jo hanaraka ny fivavahana tiany sy ny zavatra inoany ny olon-drehetra sy ny antokon’olona rehetra tsy an-kanavaka. Nampahafantarin’izy ireo tamin’ny fivoriana fanaon’ny Filan-kevitra Momba ny Zon’olombelona ao amin’ny ONU izany, tamin’ny 5 Jolay 2013.

Iray monja hatramin’izao ny fiangonan’ny Vavolombelon’i Jehovah voasoratra ara-dalàna any Ouzbékistan. Any Chirchik, any amin’ny faritr’i Tashkent no misy azy io. Maro anefa ny Vavolombelon’i Jehovah mipetraka any amin’ny faritra hafa. Tsy afaka nanoratra ara-panjakana an’ireo fiangonana vaovao izy ireo nanomboka tamin’ny 1996, ka tsy mba voaro ara-dalàna rehefa mivory ary mety ho voasazy. Hoy A^toa Yurchenko: “Manantena izahay fa hihatsara kokoa ny toe-javatra, noho ilay fifampiresahana vao haingana tamin’ny manam-pahefana. Mety mba ho voasoratra ara-dalàna daholo amin’izay ny fiangonan’ny Vavolombelon’i Jehovah manerana an’i Ouzbékistan.”

Tena tian’ny Vavolombelon’i Jehovah any Ouzbékistan raha afaka manaraka ny fivavahany an-kalalahana izy ireo. Manantena koa izy ireo fa tsy ho ela dia hosoratan’ny manam-pahefana any ara-dalàna ny fiangonan’izy ireo.